幾個月前傳出前民主黨成員馮煒光將出任新聞統籌專員(IC)，惹起民主黨前「自己友」一番質疑，最近有週刊更表示馮煒光會大熱墮馬，仲講到資深傳媒人潘麗瓊、商台新聞總監陳淑薇和Roadshow營運總裁盧瑞盛都係接任人選，不過我地求證過後，三個人無一個似，消息話馮煒光仍然係大熱，IC人選好快公布。
經過添馬艦見到知情人士，講起馮煒光事件。佢話外界以為鬧兩句CY就會轉軚不搵馮煒光做IC，就真係唔太了解特首囉。而且呢個年代大風大雨，要搵人做IC並非易事，正所謂唔夠資格想去做的人好多，夠資格又想做的人就無乜幾多，而上任專員鄧惠鈞早於六月已離任，都唔適宜拖咁耐啦。
週刊傳馮煒光墮馬，CY另外搵人，不過我地直接間接搵過三個當事人，個個都否認，仲係提高八度去否認嗰隻。潘麗瓊話「戇居，作嘢，有乜好做? 唔會做。」
陳淑薇大大聲話：「我何德何能?」(其實佢德能俱備，不過唔想落水啫)。盧瑞盛就：:「得啖笑。」佢地個個講到咁實，唔係左避右避，一啲都唔似傾緊囉。
我地怕添馬艦知情人士未夠堅，再搵權威人士問一問，佢拋咗一句：「好快會公布」。需知做IC品格審查都要搞兩個月，而家除咗馮煒光之外，其他所謂人選十劃未有一撇，點樣「好快公布」?
馮煒光當日講過他必要時能做政府發言人，「類似白宮發言人之類」。外界好想睇吓如果佢咁搞會爆出乜嘢好戲，知情人士話估佢當時都係隨口講，未必太認真，唔好話日日開記者會代政府發言，即使一個星期開一次「白宮發言人式」記者會，都唔易講，因為啲好料在各局和部門之中，佢地有攞到分的好嘢，點解要放俾IC講唔自己講？結果好易出現衰嘢叫專員講，好嘢留番俾自己講的慘況，例如商務局局長蘇錦樑唔想俾人質電視台發牌，就叫馮專員你代我出去講講啦。咁搞法個專員幾打得都好，打三五七鑊實會死。結論係記者朋友唔好太寄望去「白宮記者會」鋤馮專員嘞。
聽完佢咁講，我只能講三個字：大失所望囉。
巴士的團隊
Ariel
** 博客文章文責自負,不代表本公司立場 **
《都市日報》7月時傳出以2億元賣盤予藝員徐淑敏的丈夫黃浩，隔了幾個月沒有下文，市場擔心交易能否完成。不過知情人士話，交易沒有問題，估計下月就會完成。
原來買賣雙方過去幾個月只是搞緊一些交易的技術問題，即使《都市日報》的瑞典母公司，都話唔知點解香港交易有咁多技術問題要解決，不過如今搞得七七八八，下月可以完成。
黃浩幾個月前接受訪問時話過，今次交易為單獨出資，將來不排除引入策略性股東。佢又話有信心可於三年後回本，未來不會干涉編務，只會提出大方向。當日黃浩曾提出一個方向，話《都市日報》可以大搞娛樂版，甚至整番啲狗仔隊咁話。
不過時移世易，聽聞《都市日報》未來老細已改變主意，不再想搞狗仔隊，改行搞電子版，皆因在幾張歷史較長的免費報中，《都市日報》的電子版比較落後，要急起直追咁話。如今真係愈來愈多人鐘意搞電子嘢啦。
