政事
青年新政梁頌恆及游蕙禎，因宣誓無效失去立法會議席，二人提出「終極上訴」，終審法院今日駁回申請。即是話他們的上訴已經終結，DQ已成定局，還要被追討訟費。
梁頌恆在庭外表示，預料對方訟費約1200萬，將要由他們承擔，估計他們的最終結果將會是破產，因1200萬是他們無論如何都無法負擔的。被問及對於事件有否感後悔時，梁頌恆以自己無水晶球作回應。
梁、游連場官司，無論控辯雙方都是出明星級大狀，原審時政府找莫樹聯和余若海兩個本地資深大狀出戰。今次對方申請向終審庭上訴，代表控方又是余若海。打咗咁耐官司，夾埋1200萬訟費都好正常啦。不過梁、游破產，呢筆數就要由納稅人來填。
梁、游最後一定會踏上破產之路，雖然4年後會解除破產，但曾經破產係人生汚點，以後借錢都難啲。
政壇高人話，2014年一場佔中，令梁、游一夜間成為政治暴發戶，年紀輕輕就借勢當上立法會議員，但就如放煙花一樣，爆完就煙消雲散。佢地由於宣誓無效未曾上任，都未享受過尊貴議員的生活，就已經玩完，未來很有可能，就此從政壇中消失。
Ariel
** 博客文章文責自負,不代表本公司立場 **
澳門在天鴿侵襲之後搞到一鑊泡，除了死得人多之外，災後清理亦出現大問題，終於在今早向中央政府要求，批准解放軍駐澳部隊出動1,000人，協助政府救災。
搞到要出解放軍，都算罕有。香港評論家就猜測，中央是否借澳門災情，搞出解放軍出營的先例，順便做埋俾香港睇。
但澳門朋友就話，香港人想多了，而家已經係災後兩天，澳門仲係七國咁亂，好多街道亦然被樹枝垃圾阻塞，自來水又未回復供應，最新公布係暫停接待旅行團，幾大鑊可想而知。由於香港清理工作已經完成，唔知澳門有幾慘。澳門政府搞唔掂，唯有叫解放軍，而當地人對解放軍幫手甚為受落，覺得會有效率過政府好多。
佢話今個星期日另一個颱風又到，若不能在明天(周六)前清理好，道路未開通，衰起上又出事，消防都唔知點去救人，今次有些地方係消防5、6個鐘才到，俾人鬧到反艇，盡快清空路面，係最急需的事情。
澳門朋友又話，澳門9月17日舉行立法會選舉，距令只有3個星期，呢次風災勢成為立法會選舉的重要議題，政府搞得愈差，建制派的壓力愈大，阿爺見到都心急，出解放軍幫幫手，只係防止問題再惡化。
