港航貴賓室好正 票價有競爭力

Sebastian最近搭飛機返大陸，試吓坐港航的商務客位，亦首次享用佢地在香港機場的貴賓室，發覺服務一流。好多人誤會咗香港航空是一間廉航，其實佢係一間全服務的航空公司，亦都有商務位、有貴賓室。

當日係早上飛，所以係貴賓室坐咗一陣，發現佢地原來可以落柯打叫煎蛋，就煎咗兩隻太陽蛋加豉油，呢種煎蛋服務，我去勻其他航空公司的貴賓室都唔係咁多有。

港航貴賓室相當唔錯

煎蛋早餐貼心

在港航貴賓室仲發現一個好玩之處，就係佢地搜羅番來的舊磅。呢種磅入個毫子入去就可以磅重，佢會跌番張印好的磅重咭出來。呢啲真係香港的懷舊感覺，想當年細細個去睇戲時，就係俾5毫子用呢啲磅重機磅重。港航貴賓室有個咁好玩的懷舊磅，足證佢地重視服務細節。

懷舊磅重拾童年回憶

「磅重咭」後生少少都未見過

原來港航都非常注重各方面的服務，例如見到香港人外遊時是一家大細，但如果帶埋細路仔去服務櫃枱排隊等check-in，好似好唔方便，所以特別整出家庭的check-in櫃位。聞說呢個服務推出後，亦都大受歡迎。

另外據港航中人講起，原來唔少人搭飛機會將件樂器攞去寄艙，但好多機場搬運工人即使你掛咗易碎啲牌，佢地都唔理，將啲行李拋來拋去，搞到寄運樂器好容易爛。港航就諗咗條蹺，專登訂製有保護性的鋁箱，客戶要寄樂器，就專門放在這些鋁箱入面，就令到寄運樂器既安全又方便。

新貴賓室即將啟用

貴賓室內旅客可使用蘋果電腦

港航在香港市場的份額愈來愈大，最近就正在擴建貴賓室及不斷增加長途航線的服務。現有貴賓室5000呎，新貴賓室就大一倍有1萬呎，預計好快在9月就會投入服務。而新飛去溫哥華的航線聽聞好爆滿，原因亦都好簡單，港航的商務客位票價兩萬幾蚊，對手要四萬幾蚊，剩係價錢都便宜了一大截，港航亦都有良好服務，自然吸引咗好多旅客改搭港航。

隨著港航的長途航線逐步開通，例如今年稍後將來會飛洛杉磯、明年會飛倫敦，相信港航在長途國際線上，競爭力會愈來愈強。

Sebastian

** 博客文章文責自負,不代表本公司立場 **

旅發局進一步擴大旅遊義工計劃，準備招募更多對旅遊業有熱情的市民尤其是年輕人，希望佢哋身體力行做好東道主的角色，同旅客分享各種旅遊主題和知識。

Sebastian去聽了這些義工分享的經驗，發覺原來喺旅發局做義工真係唔係「義工」兩個字咁簡單，佢哋的經歷有趣的一面，也有感人之處。

「旅遊義工」Agnes退休前任職跨國公司管理層。

退休前在一家跨國公司做管理層的Agnes，擔任旅遊義工計劃已經有12年的時間，有什麼令佢印象深刻的經歷呢？Agnes分享話，在2018年的時候，遇到一位英國來的老人家，帶住一家大細同一本相簿，想搵返相片中的景色拍照留念。原來呢一位英國老人家係喺香港出生，5歲時跟隨父母返回英國居住。根據呢位老人家的自白，他對香港的記憶全部來自父母影低嘅相。

收到呢個請求之後，Agnes就一心想幫佢完成這個心願，認真幫老人家研究攝影地點喺邊度。結果就發現，除了一個景點外，其餘全部都對得上，Agnes就教老人家如何去現場影返啲相。佢哋影相時甚至擺出了當年老人家父母的甫士。

因為參加義工計劃不是日日返工，每次服務時長僅需大約3個鐘，Agnes隔幾日才會去到尖沙咀旅遊咨詢中心當值。事件過去後，有天返時時，有旅發局同事搵到Agnes，話英國老人家來告別，留底紀念品俾佢。Agnes打開禮物一睇非常感動，原來係老人家的父母當年喺香港影的舊照片。Agnes覺得呢啲係老人家的獨家回憶，不敢收藏，因為承載咗佢對父母的緬懷。後來先知，原來老人家已將舊相數碼化，送俾Agnes嘅係拷貝，現在存放在旅發局。

Agnes話，每當想起這段回憶，自己能夠幫老人家完成心願，好有滿足感。

退休之前喺跨國企業做管理層的Agnes仲笑言話，做義工工作仲有一個好處，就係佢平時返工工作壓力非常之大，做義工反而係佢緊張的工作生涯找到放鬆自己的一種好方法。

由新加坡回流香港發展的Marco，透過參與「旅遊義工」計劃重新認識香港。

Marco做咗6年的義工，佢係土生土長的香港人，但之前去了新加坡定居工作，但仍然覺為香港「做番啲嘢」，於是加入到義工招募計劃，現在從新加坡回流回香港，更希望通過計劃喺香港服務遊客，將香港的旅遊咨詢同旅客分享。

由於曾在新加坡生活，熟番當地人的生活習慣和語這，在做旅遊義工時，可以運用經驗協助遊客，例如，了解新加坡沒有鵝，只有鴨供應，所以明白新加坡遊客到香港品嘗和購買燒鵝是熱門活動，他就一早了解定向遊客介紹。

做旅遊義工，除了要求兩文三語流利，如果識多一種語言，對工作就更有幫助。Marco就笑言，除了三語，他仲識講新加坡式的英文，咁接待新加坡遊客時，佢就有個人優勢，黎到香港玩的新加坡人亦會覺得有親切感。

最新一期的旅遊義工計劃已開始招募，一直去到5月31日截至。今年成功入圍咗呢個計劃的學員，除咗可以學習多項本地旅遊方面的知識，譬如傳統本地文化、購物、綠色旅遊等等，今年仲邀請到星級導師，教大家點樣做好旅遊使者。

各位如果有興趣都可以試下報名參加計劃，為香港旅遊出一分力，亦都係結識世界唔同地區朋友嘅好好機會。