CY放假去英國

佔中投票炒到興烚烚，仲有新界東北撥款又喺財委會搞到一鑊泡，政局一個字：亂。

 

特首辦昨日就公布CY今晚起放假四日，有評論員估CY放假有「神秘任務」，要上北京「接旨」，亦有人話係中央策略，唔想民望低的CY，成日留喺香港，又有人估CY壓力大，要抖一抖。

 

佢呢個時候放假，又難怪揣測咁多。至於話上京傳聞，據特首辦中人講，CY係今晚飛機走，應該係飛歐洲的機，知情者就話CY要飛去英國，屬私事，呢個假期早幾個月前就預告咗，唔係臨時臨急先話放喎。

Ariel

** 博客文章文責自負,不代表本公司立場 **

昨日城市論壇又爆火，壹傳媒集團主席肥佬黎對青年民建聯主席周浩鼎，雙方就肥佬黎和外國政客交往問題拗到七彩。

民建聯周浩鼎唔止質疑佔中公投及壹傳媒網站受到黑客攻擊係「苦肉計」，又批評黎智英作為傳媒老闆，同美國前國防部副部長伍沃夫維茲在港會面，伍夫維茲係一個美國最鷹派嘅政客，質問他作為傳媒老闆，與人交往方面是否應該多加檢點。

肥佬黎智英隨即反駁，話如果做咗傳媒老闆，就只能交中國認可嘅朋友?無論中國做啲咩嘢都好，中國做嘅嘢就一定啱? 之後周浩鼎再追殺話世界各國對本地傳媒接受外來投資或併購的規定相當嚴格，肥佬黎開始慶，話自己冇收外國勢力一分一毫，認為周浩鼎無故講起「外資併購」係「胡說八道」、「無恥」、「離晒大譜」。

 肥佬黎鬧人唔口軟，佢一坐低已經鬧保衞香港運動發起人傅振中，肥佬黎一見佢哋，就高舉雙手豎起拇指話：「我以為今日落雨改地點，會同你哋班屎忽當大腦嘅人緣慳一面」，呢個姿勢，真係似十足一個大佬咁格。

20140623_黎智英 (1)_700

Ariel睇睇吓覺得有啲奇，點解一個傳媒老闆，會變身香港佔中運動的代言人，成為泛民領袖，而其他泛民政黨頭頭反而無晒聲氣，香港的民主運動到底由誰領導緊架?