社會事
《壹週刊》原定昨出版埋賣盤交易完成前的最後一期，就交俾買方黃浩接手，但最後關頭又現變數。壹傳媒昨晚發通告，指交易日期延至10月底。問題是壹仔下期書是否交俾黃浩做呢?
據《蘋果日報》報道，交易延後是因為買方黃浩盼等待台灣投審會完成審批，才完成買《壹週刊》的交易。
《蘋果》話《壹週刊》新班子如期正式運作，70名原員工過檔新公司，下期雜誌基本上會由黃浩旗下新班子全權負責。《壹週刊》總編輯黃麗裳將留守至下月15日的交接安排，不會改變。在10月31日交易完成前，在法律上《壹週刊》仍由壹傳媒持有，但由下期開始的《壹週刊》基本上已由黃浩旗下新班子全權負責，黃麗裳不會再過問週刊內容。
E+娛樂預告併入《壹週刊》
另外黃浩自己的E週刊出埋今期後，下期將不再出版。《E週刊》發行商已通知報販，《E週刊》出埋今期第100期後，將會停止發行。所有回書自10月5日起回收，逾期回收不會受理。
E+娛樂即娛樂書將併入《壹週刊》，今期E+娛樂封面亦寫明今期係「100期完滿號，下期強勢併入《壹週刊》。」
Ariel
** 博客文章文責自負,不代表本公司立場 **
新一期《壹週刊》出版，大字標題《一個時代的終結了》，告訴讀書壹仔27年傳奇結束，預告下期將過檔到商人黃浩的手下繼續營運。
不過晚上6:36分壹傳媒發出通告，話原定10月5日初步完成出售《壹週刊》予商人黃浩的交易，雙方協議延期，將初步完成日期延後到10月31日。黃浩要將初步保證金由4000萬增至6000萬，並要在今天後5個營業日內(即下周三之前)，支付2000萬的差額。黃浩亦要負責由10月1日至交易完成日期止期間有關資產的經營虧損。
按壹傳媒和黃浩原定的合約，在10月5日初步完成交易後5個工作天，就會發出通知，再過10個工作天，就要俾第二筆1.7億的交易金，即係未到10月底都要攞多1.7億出來。
如今呢一吓臨門脫腳，未能如期在10月5日初步完成交易，就係話黃浩只要放多2000萬，又可以睇長一點時間。
中環八卦金融界就問，今期《壹週刊》大字標題話《一個時代的終結了》，預告了下期將過檔到商人黃浩的手下營運，似乎係按原定下周中初步完成出售交易的合約日期，才有此安排，如今交易推遲，咁《壹週刊》仲交唔交俾黃浩玩住先呢？按通告話黃浩亦要負責由10月1日至交易完成日期止期間有關資產的經營虧損，睇字義似乎係唔易手住，壹傳媒再做住先，但經營虧損要黃浩負責。
而家的局面似係一個兩難題，若《壹週刊》照樣易手予黃浩經營，若黃浩最後唔能夠完成交易，又要交番轉頭，將本書咁交來交去，真係唔死都交到死喎。若然唔交俾黃浩住，但呢期又預告哂會下期易手，下期又話對唔住都係我地繼續做吓先，又好似幾兒嬉喎。
真係得一個亂字。
