阿爺同特區政府研究削減自由行，開始有啲眉目，消息話可能將「一簽多行」(實際上是「一簽無限行」)，改為「一簽N行」(N係一個實數)，有可能係「一簽52行」。
收緊自由行源於反對太多內地旅客來港，人多擠逼的情緒，開始時有意見話不如把「一簽多行」改為「一日一行」，因為有些水貨客一日來好多次，改「一日一行」就可以打擊內地人來香港走水貨，但後來覺得只改做「一日一行」唔夠，可以縮減的人數有限。
要了解成件事，首先要明白所謂自由行係一種「一簽多行」的簽證，大陸發咗簽證俾內地人，佢地揸住個簽證就任嚟。根據政府的數據，去年訪港旅客總數為5430萬人次，內地旅客有4075萬人次，其中又有1215萬人次通過「一簽多行」訪港。
如果個大陸客一日嚟幾次香港，呢啲所謂「一日多行」旅客，形跡相當可疑，都好可能係水貨客，所以就有限住「一日一行」之建議。但商務及經濟局局長蘇錦樑月中透露，過去的12個月內，呢啲「一日多行」的旅客只佔3.5%，數量有限，限咗佢地每日嚟一次，作用也不太大。
所以就有一年內「一簽N行」的建議，例如「一周一行」，即係一年「一簽52行」，雖然聽聞政策未最後定，但都係傾向呢類「一年52行」、「一年26行」(兩周一行)的政策。現實上大多數自由行客一年嚟5至10次，佢地包括高質素的旅遊客或商務客，特區政府最唔想影響到佢地，預計「一簽52行」對佢地影響不大。而深圳亦鐘意「一簽52行」，因為深圳有200多萬有戶藉居民可以攞「一簽多行」簽證來港，改為「一簽52行」，若他們想來香港買日用品，一個星期嚟一次都OK，呢種改動深圳居民無咁大反對。至於內地水貨客，一個星期只能嚟一次，咁就無得做啦，變成走水客都係香港人自己走，阿爺此舉有「走水貨都係你地香港人自己走，唔好怪我」的味道。
雖然內地同香港政府都想把削減自由行的影響降低，但我覺得一開始減，就預示自由行呢個政策對香港經濟的良好影響，開始從高峰滑落。自由行最好食的肉己食盡，最優質的客本來已開始有好多選擇，可以去倫敦巴黎紐約，不一定要來香港(法國等一直在放寛大陸客簽證限制)，而香港政策再限一限，雖然唔直接影響到那些一年嚟十次八次的旅客，但佢地都會諗諗去第二度。
香港做來做去都係那幾瓣，金融、地產、旅遊、航運，若講就業就加多一樣大型基建。呢兩年金融放慢，地產方面政府唔佢太熱，航運早已夕陽，連旅遊都見埋頂的話，好似個波拋上半空，過咗最高點開始跌落嚟。一兩年內就業都唔係問題，但長線少少就好難講啦，而家係時候諗諗橋，唔做咁多內地客生意唔緊要，要搵啲新生意嚟做先至得啦。
盧永雄
美國眾議院撥款委員會表決通過，將在華盛頓中國駐美大使館前的一段街道，以諾貝爾和平獎得主劉曉波命名，此舉明剃中國眼眉，等中國以後講駐美大使館的地址時，都要講劉曉波個名。
美國呢個做法，同文革時代大陸將西方使館所在地的北京東郊民巷改做「反帝路」一樣，有啲郁人唔到就在自己屋企玩嘢的味道，似「小學雞」，靠把口贏人。
千祈唔好以為我好贊成大陸拘禁劉曉波，判佢11年監。劉曉波搞的「零八憲章」只係吹水嘢，無行動，唔使拉人判監。但美國借呢啲嘢嚟玩，我又唔係幾支持，因為美國又好、其他人又好，若果真係為劉曉波好，應該每次見中國官員時，都不公開地表達意見，話監禁劉曉波不利中國融入國際社會，與大國形象不相稱，遊說中國多啲，佢或者會早啲放人。
美國而家咁公開玩中國，中國當然唔會聽你枝笛，你借劉曉波玩佢，佢加劉曉波幾年監又如何? 美國人這樣玩時，有無諗過中國的反應?
當然，中國更可以一樣「小學雞」地，玩番美國，例如把北京美國大使館所在地改做「拉登路」啦。或者咁樣唔好，太鼓勵恐怖主義，中國都要反恐，咁改做「伊拉克戰爭陣亡者紀念路」又如何? 再衰啲可以改做「大殺傷力武器路」，因為小布殊當日話伊拉克有大殺傷力武器所以發動伊戰，結果戰爭打完半件大殺傷力武器都搵唔到，但係戰爭死咗七、八千人，所以「大殺傷力武器」雖然不存在，都值得紀念一下。
中國處理政治異見份子的政治問題，是中國的軟肋，俾美國捉住玩。同樣地，美國在中東地區特別係伊拉克搞到咁失敗，就係美國的軟肋，唔玩佢只係俾面佢。伊拉克如今亂局一場，美國總統奧巴馬未能決定空襲伊拉克，美國高級情報官員向傳媒披露，他們評估聖戰組織「伊拉克和黎凡特伊斯蘭國」（ISIL）的實力已達到高峯，透過在敍利亞和伊拉克攻城掠地，搶得大量武器和資金。ISIL跟地方的遜尼派宗教領袖和部族結盟，有助長期控制剛掠奪得來旳土地。即使ISIL不攻陷首都巴格達，伊拉克都很可能出現巴格達政府、ISIL及伊拉克東北部庫爾德族自治區三分天下的局面，國家面臨分裂，最大的一塊還是ISIL佔領的西北部地區。
ISIL不滿足於只佔有部份伊拉克，它要在伊拉克、敍利亞和約旦建國，它正在西方招募不滿現實的伊斯蘭教青年，去伊拉克和敍利亞投身他們。可以想像，當美國想放手中東跑去亞洲圍堵中國的同時，中東地區卻連番失陷，ISIL冒起建國，看來快將成事。情境好像美國這隻螳螂捕蟬，卻有好大隻黃雀在佢身後，美國到處點火，但顧自己後欄都未顧得掂。
內政應該講道理，外交就要講實力。美國而家唔係咁夠力，想中國政府做乜就逼佢做乜。香港人爭取民主，唔好諗住靠美國之助，要靠自己啦。
盧永雄
