政事
七一又遊行又佔中咁多事，幾乎忘記講吓今年的授勳名單，出現一、兩位泛民的名字，民主黨羅致光獲授金紫荊星章，呢個唔覺意外，佢近年喺扶貧工作上與政府都做咗幾多嘢。但何秀蘭同莫乃光成為太平紳士，政界就有啲唔係太理解。
據聞係有問責官員覺得表面上工黨雖然比較激，但私底下同政府官員算係有偈傾，所以就覺得可以俾個JP(太平紳士)何秀蘭。
政府始終都想過到政制方案，要過到，都要有五、六票泛民票，喺授勳上俾啲「荷蘭水蓋」泛民，希望有助降降溫，唔好搞到雙方拉得太行，冇晒偈傾。
但Ariel睇嚟就唔容易，即使係在私底下同政府喺好問題上有偈傾，但喺政制問題上好難傾，所以呢個「荷蘭水蓋」俾咗都未必有用。大家都睇到啦，李卓人佔中個晚都有出來啦，唔見得工黨可以喺政制上傾得到喎。
Ariel
** 博客文章文責自負,不代表本公司立場 **
毓民在立法會內掟杯，其效果繼續成為政圈中人爭論話題。有人話佢出咗位，有話佢將輿論焦點轉晒，不過大家都同意，溫和泛民係受害者。
昨日屬於「飯盒會」的20幾個泛民議員一早部署好，在特首答問大會時將抗議行動升級，唔等特首CY發言，搶閘出來走向CY抗議，繼而集體拉隊離場，製造震憾效果，以抗議CY無具體回應大遊行的訴求。
不過當呢班泛民按劇本做walkout時，毓民突然發難，衝上前排議員座位枱上定嘢，跟手擲埋杯，自然成為傳媒焦點，後來CY報埋警，更有好多談論話題。泛民議員私下投訴，話毓民的做法俾彈藥CY反擊泛民，令市民反感，失晒抗議效果。
若不論動機，在泛民支持者心中，毓民出咗位，20幾個泛民變得無料到。最後呢班泛民出來發言，由馮檢基代表發言，同毓民劃清界線，呢啲行為對泛民後生支持者嚟講，唔太討好。有建制派中人私下話，呢種劃清界線發言係豬頭骨，攞唔到分，難怪大黨唔願做代表出嚟講，由得阿基講。而家做溫和泛民，真係左右不是人。
