數年前有個台灣朋友對我說，佢地社會十分政治化，藍營綠營，壁壘分明，即使佢自己一家人內，可以阿爸擁藍營，阿仔挺綠營，搞到嗌大交。佢言談間慨嘆，台灣的和諧氣氛一去不返。
6.22公投和7.1遊行之後，本地社會氣氛急促對立化，我手機有十幾個WhatsApp朋友群組，在多個群組內都爆出罵戰。初時只有公投派的聲音，聲言要行出一步爭取真普選，比較一面倒。但7.1之後，有愈來愈多反對佔中的人開始發聲，多數是支持警方執法。初時還有少少理性討論，但後來變成互相指罵，多年老友都無面俾。
最好笑的是近期大家可能係燥底，郁啲就開火，有朋友本來在群眾約食飯，有人話食中菜，有人話食西餐，有人話「無所謂啦」，結果亦有人出來插，話唔揀定中餐定西餐就係「無立場、無原則」，朋友話「食飯啫，使唔使咁認真呀?」呢個世界變得容忍度好低啦。
呢個群眾在政治上咁對立的局面，係政治動員(Political mobilization)的結果。先是泛民動員群眾參加公投和遊行，出席人數眾多，搞得頗有聲勢，接著就激起反佔中的團體警覺，發動群眾支持警方執法。兩方都搞出很多文章、貼圖、影片出來，支持己方觀點，貼在WhatsApp群組和Facebook專頁之上，然後在網上、手機上傳來傳去，再叫他人廣傳。熱情者一見自己不滿的文章，都覺得自己啱晒、對方錯晒，覺得真理在胸，馬上破口大罵。
我從各群組發言情況觀察，年輕一點的群組支持遊行佔中居多，年長的群組剛好相反，不同職業也有不同傾向，經常罵人的職業支持佔中居多，經常被罵的行業平時少發聲，今次都開口反佔中。
綜觀環球政局，在各類政治矛盾中，種族加宗教衝突最激，社會經濟衝突次之(如窮人對有錢人)，純政治訴求再次之(例如民主化)。但香港的民主化運動，其實混合了族群矛盾(大陸人對香港人)和社經衝突(地產霸權對中下層)，所以點燃起來，亦有可能生出燎原大火。
我愈來愈擔心，社會這樣分化下去，會出現台灣的藍綠對決、或泰國的紅黃對陣的狀況，最後出現港版紅衫軍對黃衫軍，在街頭大打出手。我們距離這種混亂日子，似乎愈來愈近。
盧永雄
房委會通過公屋加租10%，不會一刀切提供一個月租金寬免。公屋租金和居民收入掛鈎，公屋居民平均每月入由2011年的15,473元，增加到去年的18,455元，增幅高達19.3%，但根據《房屋條例》，租金加幅只以10%上限，所以今次加租10%。
一個公屋家庭平均租金1542元，即是平均加租154元。
房委會要加租，因為有赤字，過去兩次加租當年都免租一個月，今次沒有寛免，因為本年度財政預算案已宣布公屋免租1個月，抵銷了加租效果。房委會今年初預計，今年度公屋營運赤字17億元，加租10%後，可赤字可減至9億元，但若免租1個月，赤字會再增至21億元，房委會為免赤字咁大，不再額外免租。
公屋居民可能好唔滿意加租，但租私樓住的市民就覺得有公屋住已經好正，大家手指指，其實真正的問題是：幸福的日子漸漸遠離我們了!
過去幾年，政府收入多派錢鬆手，物價剛升又未升到好貴，工作收入初期升得好快，總之係比較爽。
如今物價升咗幾年升到高位，人工又愈加愈慢，個別行業如高檔零售更開始倒退，政府又手緊咗，唔係咁鬆手派錢，感覺自然差咗。
早兩日同個做裝修行業的朋友傾開偈，順口講句「你地好搵呀!」自己個腦將裝修同建築搞亂咗，心中只想著紥鐵有2000元一日人工，唔記得人地做裝修。那個裝修朋友即時有反應:「邊度好搵? 直情好差，政府出辣招打擊樓價，買樓換樓的人少了很多，我地做裝修的工程大減，根本開工不足!」
另外有外國名牌消費品高層對我講，呢兩年奢侈品生意唔係差，係好差。四年前內地客來香港唔貴唔買，買幾十萬一件貨都面不改容，而家買幾萬銀嘢都要講價。幾年前名店生意好分紅厲害，連開門那一個阿嬸加埋分紅都兩三萬一個月，而家要裁人啦。仲話減自由行，生意實會更差。
不過我估就業情況轉壞的打工仔只是一小撮，大多數還可以，但這種轉壞的情況，只是剛開始。我們過去幾年的幸福日子，全是因為中央銀行大印銀紙所賜。2008年美國出現金融風暴，美國領袖在國際場合見到溫總，同佢話美國經濟好大鑊，中國要好自為之，溫總反應過大，回去就策劃出4萬億人民幣的救市大計。與此同時，美國聯儲局亦大加減息加放水救市。
成街都係錢，乜嘢都起泡，初時好開心，慢慢就賴嘢。中國早兩年通脹高企經濟過熱，只能大力收水，中國銀根緊，香港生意都減。而家美國又嚟收水啦，好可能在明年初開始加息，錢根會慢慢緊番。收緊的感覺不會來得太快，但就會一步步加深，記住「由奢入儉難」呢句話，物價未跌，收入減少，福利減派，呢啲日子一年後就到。
盧永雄
