自由行退潮，旺區吉鋪湧現，主要零售區鋪位空置率大升，創10年新高，銅鑼灣於半年內，吉鋪暴升至126個，尖沙咀有95個，中環79個，旺角48個。鋪市陷入一個拉鋸局面。
過去半年核心零售區的人流漸疏，過住零售商狂俾租搶鋪的情況不再，部份在租約期滿後更收縮走人，業主亦不願大幅減租，就出現吉鋪。
一個著名奢侈品品牌代理商話，三四年前係最風光的年頭，大陸商家搵到錢，送禮風氣又盛，真係攞幾十萬現金嚟買隻錶送禮都唔講價。如今幾萬銀一隻錶都要講價，因為隻錶只係買嚟自用。啲客話無人再買名錶去送禮，自從內地出咗官員叫做「手錶哥」，上級領導去到佢個地方探訪，佢除咗隻錶迎接，露出一個白白的錶印，俾報紙登晒出來，以後就無人送錶，費事害死人啦。搞到佢地生意麻麻，雖然都頂住照租，但係利錢就大不如前啦。
睇完客個方面，又搵啲業主傾吓，原來業主好多都仲有力頂，所以由得啲鋪空置。好多業主手上唔止一間鋪，又按咗俾銀行，如果減租太多，銀行會重新為物業估值，為免牽一髮動全身，所以租金唔到價，業主情願唔租，以免拉低晒同區鋪位的估值。
有個業主咁話，「而家市面資金多，股市又唔係咁旺，住宅又無得炒，鋪主賣咗間鋪都唔知做乜，唯有照揸，始終有舊磚頭好似好啲，一綫鋪同10年前比，鋪價係5倍，租金係3倍，若然買得早者，無乜壓力，亦唔使急租出去。」
呢個業主估，而家係鋪主同租客拉鋸緊，空置一年半載，好多業主仲頂得住，若然市道唔恢復，空置一兩年，持貨多的業主頂唔順，最簡單是割價賣鋪，否則就要大幅減租就個市。
香港好多人做零售業，開始感受到旅客生意見咗頂，愈貴價的生意冷得愈快，平價生意仲有得做吓。未來內地打貪官唔似咁快停，香港反對內地旅客的聲音未減，阿爺又話要收縮自由行，負面因素唔少，唯一寄望是大陸經濟快啲好轉，等旅客手頭鬆番少少。
我認為呢個係一個零售的轉角市，雖然唔係跌得好急，但係由盛轉衰的苗頭已現。過去租金、工資、物料等做生意成本大幅上升，初時遊客多對產品需求同時急升，產品賣價同樣急升，生意仲好好。到需求下降，銷售不前時，成本無法降低，做生意者輸錢頂唔順就要離場，若大面積出現這些情況時，經濟調整就會來臨，要洗牌再玩過啦。
盧永雄
