日前網上瘋傳一張「地鐵長平公主照」，加上踏入農曆七月，令人不寒而慄，但自從其後有更多類似照片流出，相信是炒作居多。不過講到地鐵的靈異鬼故事，老一輩鐵路員工就傳說多多，有傳聞話地鐵尾班車是讓靈體坐的，所以尾班車的車尾最好就「留座」。
網上圖片
鬼節流流玩呢啲？網上流傳的「靈異照」，最終被一班「僵屍」孭住背囊又拎住相機等車「穿哂幫」。
對於「靈異照」流出，港鐵回覆本網查詢指，沒有收到舉報的紀錄，亦不清楚相片是何時拍攝，希望乘客顧及其他乘客，不要作出滋擾行為或動作。港鐵話車站職員會巡查，乘客如遇滋擾可通知職員提供協助。
今次流傳的「長平公主」雖然「假假地」，不過老一輩背的鐵路員工對於鬼故事，就有另一套講法。
資料圖片
香港鐵路總工會理事長倪錦輝話，大約20幾年前，以至地鐵通車初期，相傳地鐵的尾班車不是給人坐，而是「俾鬼坐」，所以尾班車的車尾一般都不坐人，「要留座」。
他又話，曾經聽過有人講，見到有物體企在路軌中間，「好難講佢真定假，又得佢一個見到，咁惟有信佢嘅啫，話佢時運低，當半講笑咁講囉！」
香港殯儀館 - 資料圖片
除了地鐵的故事，電車、巴士都有類似講法。倪錦輝話，在中巴年代，老一輩前輩都流傳話，車經過北角香港殯儀館位置時，就算有客無客都好，「都要開一開門，俾佢地落一落。」
東鐵過去亦曾傳出靈異故事，倪錦輝話70年代有很多偷渡客來港，在路軌被火車撞死，有車長及維修人員夜晚經常見到有靈異事件，有鬼在路軌中間，現時過時過節都會燒衣，每逢農曆七月十四，東鐵都會有儀式，西鐵同輕鐵都會私下做，不過員工都可以問公司贊助，「燒衣、食舊燒肉，求個安心囉！」
至於早年九鐵「火車頭」廣告，被指「多咗一個」的鬼故事，倪錦輝話：「怪就怪啲，但睇睇下又冇乜野，可能啲人疑神疑鬼啫。」
網上圖片
對於今次「長平公主」照流出，倪錦輝話擔心影響乘客，從而影響到員工，「你扮恐怖嘢，乘客可能睇睇下電話，抬頭見到，又可能突然你出現在樓梯轉角位，影響到乘客，站務見到就要即刻去睇咩事。如果上到車又要通知，成條綫嘅人都緊張哂，一日一單搞到伙記都火哂。」
他話：「鬼節流流雖然應節，但公眾場所就唔好玩喇！」
