政事
今日見到所有泛民一家排開見記者，唔止學聯、學民思潮，仲有佔中三子和泛民各政黨代表，睇落個格局唔同晒，一個鬆散聯盟已成型。
Ariel聽講係肥佬黎同李馬丁等對佔中運動由學聯揸飛，好有意見，認為要由泛民主導，最好方法就是組成聯盟，所有人一齊入晒去。你知開會講民主原則，8、9個人坐埋一枱，學聯只佔一份，一舉手，就唔到學聯話事。
泛民中人話，組聯盟呢件事在周初已開過會醖釀，想傾掂就昨日見記者，但最後傾唔掂。跟住就發生陳樞機重炮轟學聯事件，直斥學聯騎刧佔中。班學生仔唔受得咁大棍打，唯有就範，今日就一齊企出來見記者。雖然佢地無話組成咗聯盟，但係就唔再係學聯、學民，或者加佔中三子見記者，而係加埋一班泛民見記者，出現乜嘢變局，「你懂的」。
泛民主導整個運動後，鬥爭重鎮由街頭轉向議會，泛民做主角，街頭示威只是配角。運動目標由爭取真普選，變成為倒梁，至於倒梁和爭取真普選有乜必然關係，就無人深究，又係佢地講咗就拍板架啦。
Ariel
** 博客文章文責自負,不代表本公司立場 **
佔中持續，支持反對分成兩派，立法會開鑼就鬥到入議會，繼日前派民突襲成功，搶去財委會下面的人事及工務小組委員會主席後，今日立法會各小組委員會選主席，建制派包攬保安、財經、政制、食安、民政等多個委員會正副主席，而唔似以前咁有協調，正、副主席輪流做吓，實行泛民做初一，建制派做十五。
泛民多個政黨代表同學聯、學民思潮及佔中三子齊齊見記者，宣布連串的不合作行動，街頭、議會大配合，泛民話除咗有迫切的民生議案，在財委會同兩個委員會，以不通過撥款的方式，向政府全面施壓。
另一廂，建制派計劃引用權力及特權條例，成立獨立調查委員會跟進佔中事件，包括佔中影響及政府處理手法。
街頭、議會的行動目標清楚，唔係爭真普選，係倒梁。示威者要求人大常委會撤回普選框架同梁振英落台兩大訴求，阿爺企得好硬，力挺CY，又會咁啱，呢個時候澳洲傳聞爆出CY宣布參選特首、辭任戴德梁行亞太區主席時，涉嫌與收購戴德梁行澳洲公司UGL簽協議，收取400萬英鎊。UGL同特首辦發聲明澄清，但泛民議員已話要以特權法在議會調查事件，追擊之勢唔會收啦。
高人話，有關協議只有CY、UGL同相關的律師才知詳情，如今揚晒出街，又係「國家級」人馬才可以攞到料，目的就是借機倒梁，趁你病，攞你命。
佔中由街頭抗爭、去到依家爆醜聞，令Ariel就諗起前年的特首選舉的情景。高人話，爆醜聞呢家嘢，想攞CY命，子彈好可能唔止得一粒，話唔埋陸續有來。想當年選舉時爆料，都係逐小咁放，到最後先整個核彈。睇嚟大戰連場啦！
