政事
佔領運動日日有新發展，連新聞界都燒到。日前無綫爆出記者對管理層處理清場新聞手法表遺憾的公開信，昨日新聞部開咗員工大會，聞說開咗三小時，又有料漏出街。
人稱「花哥」的新聞部阿頭袁志偉在會上澄清，認為旁白予觀眾感覺就是想描述警員有預謀去打人，但未有求證前，不應在報道中形成這樣的嚴重指控，在未有進一步證據前，應該讓觀眾自己看片段作判斷。
今日社交網站流出一條聲帶，疑似員工大會中的錄音，除咗花哥開腔之外，原來新聞部經理Ming姐(黃淑明)，亦都有幫手解畫。
Ariel覺得值得聽吓。
Ariel
** 博客文章文責自負,不代表本公司立場 **
Ariel半夜聽到警方在旺角清除障礙物，晨吉咁早走落去睇吓彌敦道係咪可以通番車。
Ariel大約八點度去到亞皆老街交界現場，見到彌敦道北行線全線開通番，而南行線方面，在彌敦道同亞皆老街交界果一段，即係滙豐銀行馬路對面馬路那邊，有一班示威者同差人的談判專家理論中。
當時馬路上的示威者數目不算太多，大約十幾人，差人請佢哋走，佢哋唔肯走，傾了幾分鐘，後來見到熱血公民的大佬黃洋達出現，相信現場唔少係佢啲子弟，黃洋達叫咪，叫番示威者出番馬路，話剛才驚清場，依家唔使驚，出番嚟啦。
當時示威者大約有十多人，相對地差人數量好多，當時差人如果強硬清場，絕對有足夠人手逐個將馬路上的示威者抬走，現場所見有數以百計的差人。不過，差人就冇咁做，只係繼續勸籲，唔得就由得佢哋繼續留在馬路示威。
九點過後，馬路上聚集的人開始多番，有幾十人坐在馬路上，聽聞有啲由金鐘趕來聲援。差人見勸退不成，就在過馬路的地方放上鐵馬，分隔開示威者同使用行人路過馬路上的人。
現場所見，耐唔耐都有路過的市民，叫示威者離開。
Ariel聽到有新聞報道，反佔中的人士，用粗言穢語侮辱示威者。其實，現場所見就係粗口橫飛，反佔中人士固然講粗口，佔領人士亦都粗口回應。由於反佔中人士多數係路過講幾句就走，唔似係有組織去針對佔領人士的群眾，似係路過的街坊同市民，但見到有反佔中人士出聲，示威者都出來對罵。而黃洋達就同示威者坐在路中心。
總的來說，警方清除障礙物，已將旺角好多條路打通，僅餘彌敦道南行線一截暫時仍然封閉。睇嚟差人都係用軟性方式，在唔做成太大的衝突下，去慢慢清場。
