阿松、fit馬撐枱腳

Fit 馬馬時亨爆一句「願做梁錦松競選辦主任」，一石激起千重浪，政圈中人聽到耳都側埋，極感關注，巴士的團隊一早就收到一個超級大孖沙身邊人的短訊問道:「阿松選特首有幾堅?」

阿松猶抱琵琶半遮面，但他的43年老友馬時亨夠膽公然這樣講，必有深意。《巴士的報》早前報道曾鈺成和阿松「孖咇選特首」的報道後，曾主席大力否認，但阿松公開講得好鬆，只是笑言「誰說香港人沒有創意，現時的傳媒和報道都很大的想像力和有創意。」對記者追問他是否會去選時左閃右避，並沒有斬釘截鐵地講「我不會去選」。

Fit馬和阿松交情非比泛泛，昨天(周一)馬時亨吹水同人講做阿松選舉辦主任。今日(周二)中午即刻又俾人見到，佢同阿松在四季酒店龍景軒撐枱腳，唔知係唔係講起尋日吹完水之後的市場反應。所以你以為fit馬只係講個人意見，真係「信一成雙目失明」囉。

其實Fit馬力吹阿松會選特首，並非始自今日，話說早前港大73年畢業生搞咗個畢業40週年晚會，席間程翔上台講嘢，說起他當年在內地被捕之事，提醒特首要注意新聞自由。台下Fit馬指住阿松，大大聲話「呢啲嘢梁特首就要注意啦!」振英哥姓梁，阿松又姓梁，Fit馬大玩一語相關，都幾出位，松哥當時無否認話「唔關我事」喎。

Fit馬雖然貌似隨意，但其實講話做人甚有分寸，太離譜的東西不會四圍吹水，所以為何現時話要做阿松選舉辦主任，值得細味，難道認為阿松出來都要趁快，否則執輸行頭慘過敗家?

知情人士話，過去做特首要等聖上欽點，太早行出來見光死。但如今局勢已變，一來最後誰做特首要看北京政局變化，二來太遲行出來無人氣人地都唔會諗你，所以阿松即使把口唔認，都會開始搶繮出閘，「貼住個大內檔跑」，來參加呢場特首賽，大家剝定花生等睇戲啦。

巴士的團隊

Ariel

** 博客文章文責自負,不代表本公司立場 **

「曾俊華中蛋」呢個標題在過去的周未佔據了傳媒不少篇幅，社民連成員在周六「成功」突破封鎖，在地區諮詢會上向特首梁振英發難掟雞蛋以示抗議，結果誤中副車，財爺受到「應一應」。

 

當然呢個行動算唔算暴力，不同意見人士有不看法，CY即時已表示譴責，第二日「好打得」的林鄭亦表態話遺憾。但社民連的長毛話用暴力來形容佢哋係「抹黑」，認為國際政壇上示威者掟嘢以宣洩不滿係十分常見。

 

激進泛民呢一役「中蛋」咁突出，第二日的地區諮詢會，主辦機構就嚴陣以待，結果「女長毛」雷玉蓮所帶的雞蛋、溪錢、仲有一隻新鮮菠蘿全部俾保安要求不能帶入會場，唔知係咪保安人員太過集中在呢隻菠蘿身上，結果社民連、熱血公民等成功將各種物件帶入會場。

 

雖然當日會場保安企到密密麻麻，但結果市民在電視畫面上見到的呢場諮詢會，溪錢、紙球、水彈、膠番茄滿場飛，唔講都唔記得係做緊施政報告及財政預案的諮詢會。

 

今日仲爆出一句：掟你汽油彈呀！由雞蛋、菠蘿，發展到今日「汽油彈」都講埋，到底係咁啱，定係有層層升溫的意味呢？！

 

巴士的團隊