唔知大家平時有無去做義工呢？做義工唔單止幫到人，仲會識到好多新朋友，學到好多新知識同技巧添！不過香港人生活繁忙，Jack身邊就有唔少朋友成日話忙，唔肯去做義工，勸極都唔聽！
Jack 剛剛收到義務工作發展局朋友傳來的資料，佢哋一直推動「行義我生活」，鼓勵大家將義工成為日常生活一部份，做義工亦唔一定只係賣旗、探老人院，查實仲有好多方式。
義工局特別搜羅咗101項，製成「101種行義方式」放上互聯網同大家分享，咁以後大家做義工，就多咗好多選擇啦！
Jack上去望過，原來簡單到「珍惜食物，減少廚餘」、「為遊客引路」，甚至「幫他人淋花」都係義工服務，咁以後大家就唔好再咁多藉口啦！等我都forward俾朋友仔睇吓先！
義務工作發展局提供圖片
唔講唔知，原來聯合國將每年的12月5日，訂為「國際義工日」，呼籲全球各地政府同組織，喺呢一日嘉許同表揚義工的無私奉獻，亦希望鼓勵更多人投身義務工作。
喺香港，義工局為響應呢一日，亦會搞啲慶祝活動，佢哋今年以「125國際義工日．人人做義工」為口號，鼓勵大家坐言起行，喺12月5日做吓義工，共建關懷共融社群！
義工局仲整咗個facebook專頁，鼓勵大家透過文字、相片或者短片，分享各種「義行」，讓義工助人的感動故事傳播開去，為社會增添正能量。
除咗義工局，社會福利署亦有一個「義務工作統籌課」，亦有好多做義工的資訊，仲搵到唔少做義工的機會添，大家不妨去睇吓啦！
Jack
** 博客文章文責自負,不代表本公司立場 **
今日係長者日，一早就見到好多老人家坐車，唔知係咪因為搭港鐵唔駛錢，大家都開開心心出去玩呢？好多人以為「老友記」年紀大，病痛多，查實好多長者而家都好注意飲食，勤做運動，身體唔知壯健過班後生仔幾多！Jack就有唔少已「登陸」的朋友，經常出外旅遊、食自助餐，一樂也！
當然亦有部分長者身體較差，需要屋企人照顧，但千祈唔好以為留喺屋企，又就戒口就「無啖好食」，只要照顧者多啲心思，一樣炮製到美食！Jack 向星級廚師徐鏡昭請教，徐師傅教咗我兩道簡單小菜，一於同大家分享吓！（一至二人份量）
一、南瓜蕃茄蒸龍脷柳
南瓜蕃茄蒸龍脷柳
材料︰
龍脷柳 200 克
蕃茄南瓜 共200 -300克
調味：
鹽 1/5 匙
薑 2片
胡椒粉 少許
生粉 少許
檻欖油 1 茶匙
煮法：
1. 龍脷柳調味，醃約15分鐘；
2. 蕃茄南瓜煮熟後打成蓉；
3. 將蕃茄南瓜蓉的放於龍脷柳上，蒸6-8分鐘即成。
二、中式洋蔥湯
中式洋蔥湯
材料：
紅洋蔥 2 個 約600克
薑 粒 半匙
杞 子 40 粒
龍眼肉 10 粒
調味：
鹽 1/5 茶匙
糖 1/5茶匙 (選擇性加入)
胡椒粉 1/5 茶匙
檻欖油 1 茶匙
清水或清湯 6-8 飯碗
煮法：
1. 將洋蔥切絲備用；
2. 用油將薑粒起鑊後，加洋蔥絲炒3 - 5分鐘；
3. 加入清水或清湯，煲成4碗湯；
4. 最後加入龍眼、杞子及調味，煲約10分鐘即成。
呢兩味菜不但食材健康，賣相亦十分精緻，啱晒三高長者。徐師傅話中國人唔多飲洋蔥湯，但今次加咗中國飲食文化中的「養生」元素，再配合洋蔥，能降膽固醇和怯痰，亦能防止骨質流失添！
至於南瓜蕃茄蒸龍脷柳，南瓜甜甜又夠「林」，可以當作醬汁放在魚肉上，照顧到吞嚥困難長者需要，提升長者享受食物樂趣！
聖雅各福群會社工楊慧蘭話，唔少人誤以為長者飲食清淡簡單便可，無特別要求，但用餐可說是長者生活樂趣之一。
楊姑娘建議屋企人多留意長者對食物的喜好，每星期抽最少一至兩天與長者共餐，進食時傾吓偈，往往更勝食物味道呀！
