政改先剛剛開始諮詢，特首跑馬仔已搶閘。《巴士的報》早前報道曾主席和阿松「孖咇選特首」後，曾主席大力否認，但阿松未有正面回應，大家估吓估吓之際，阿松老友馬時亨爆出一句：願做梁錦松競選辦主任，似已摩拳擦掌。
另一邊廂，有政壇人士就仍然相信，政務司司長林鄭月娥會係阿爺心中其中一個大熱，話說最近佢最近頻頻出動推政改時，有泛民中人就話，在林鄭諸多講話中，特別留意佢有兩個觀點，一個係「特首要愛國愛港但無說也要愛黨」。另外一個係佢在傳媒專訪時提及「將來的特首由普選產生，有助提高認受性，對管治亦有幫助。」
泛民中人認為呢兩個算係敏感議題，林鄭都公開講，似有「尚方寶劍」，聽聞仲有人直接問過林鄭點解咁講，佢答話身邊的朋友都係咁睇。有泛民中人就覺得佢好似冇有怕。
再加上一向硬朗的林鄭，佢囝囝同老公都回流香港，似有為「好打得」的她打溫情牌做準備。不過，亦有建制中人對林鄭是否去馬有保留，話未到普選各路人馬已爭成咁，到真係有普選時，需要應付政局的心理質素要更高喎。
林鄭去馬與否，政壇睇法不同，但對佢「好姐妹」葉劉的睇法就一致啲，每次一數到有心跑馬仔的人選，都會計埋佢。
跑馬仔呢場賽事有排睇，但第一關都要先睇吓會否達成落實普選的共識。
Ariel
** 博客文章文責自負,不代表本公司立場 **
港澳辦發起的「全國港澳研究會」上周五在北京成立，成員包括三十多所研究機構及近三百名專家學者，由前港澳辦副主任陳佐洱出任會長，知情人士話，港澳辦不怕高調搞港澳研究會，當中有微言大義。
中央搞港澳研究，好多時表露一種政治姿態。大家唔知記唔記得，2003年香港出現大遊行後，前新華社香港分社副社長朱育誠搞過一個港澳研究所，不過最後無乜睇頭。當時香港出事，政治局委員曾慶紅帶頭搞咗中央港澳工作協調小組(當時叫做18人小組)，親任組長，朱育誠屬曾慶紅一系，就獻計搞港澳研究所，不過曾慶紅幕後領軍在2003年尾打了一場區議會選戰，建制派大敗而回，曾慶紅就不再親自搞對港事務，交番俾18年小組副組長、港澳辦主任廖暉去搞。由於曾慶紅不再直接落手落腳管理港事，朱育誠的港澳研究所本來想為曾慶紅收風，最後亦無所用，結果就無疾而終。
10年過去，港澳辦又搞出一個港澳研究會。知情人士話，港澳辦一年前開始有此構思，半年前開始接觸內地和香港學者，邀請他們參加研究會。香港固然缺乏研究香港問題的機構，但由港澳辦公然發起搞港澳研究會，也有一種身體語言，就是不怕人家說中央干預香港，所以唔怕公開搞研究。
另外港澳研究會由陳佐洱一系人馬主理，唔見咗其他港澳辦退休人馬參與，如前中聯辦副主任王鳯超，就無份參加，真係有點可惜。雖然話學者中立，但論經驗，王鳯超對港澳事務經驗極其富豐，又非常了解香港，佢無參與，又真係幾可惜。
巴士的團隊
