何君堯拒認講錯,只認是講太快~
立法會保安事務委員會連日召開特別會議討論《逃犯條例》修訂草案,在昨日特別會議上,建制、泛民又有火花,公民黨譚文豪質疑內地無新聞自由,傳媒可怎樣監察人權保障承諾嘅執行情況,建制派何君堯就話內地一樣有第四權,只是程度問題,又提到美國中央情報局前僱員斯諾登,以及維基解密創辦人阿桑奇的遭遇,批評譚文豪「淨係識得吠自己國家」,認為對方應該同時引證其他國家的情況,「包括埋你嘅宗主國,或者你自己愛好嗰個國家美國」。期間,何君堯將斯諾登的英文名字Edward Snowden,錯講成John Snowden。
民主黨林卓廷隨即提出規程問題,話譚文豪無外國國籍,要求何君堯澄清。譚文豪亦強調自己無講過自己宗主國係美國,要求何君堯收回言論。議會陣線毛孟靜插話指,「佢(何君堯)嘅常識好明顯係比較貧乏」,並糾正對方講錯Snowden個名。
何君堯稱自己只是漏了個問號,實際意思是問譚文豪「係咪你個宗主國?」只承認口快快講錯斯諾登做John。