習大大瀛台宴港澳特首夫婦

特首CY到北京述職，原定周五晚回港，臨時要改到周六早上先走，周五晚有咩重要活動要臨時加場，原來習大大發出邀請，約港澳兩位特首晚宴。

話說今日先係CY向習大大述職，之後就輪到澳門特首崔世安，兩位特首述職的地點係中南海瀛台涵元殿，之後就一起晚宴，國家領導人在瀛台請食飯，一般都稱之為家宴，好似11月奧巴馬訪華時，習大大都係喺呢度設家宴招待奧巴馬。今晚的晚宴，習夫人彭麗媛都出席，兩位特首亦帶埋夫人一齊赴會，三對夫婦在瀛台聚首都好少見啦。

 

20141226_PO_ 中南海

據了解，原本呢場晚宴在7點半結束(一般呢啲宴會都會6點幾開始)，但就比原定時間遲咗成45分鐘先至完結，食到8點3，氣氛相當唔錯，雖然唔一定係講嚴肅的話題，但大家關心的議題都有傾到。知情人士話，一般特首述職唔係次次有咁的安排，可見習主席同中央都好關心同支持港澳兩個特區特首的工作。

了解情況的高人覺得，今次習大大見CY時，好多嘢在鏡頭前都講得好清楚，好似係指中央堅定不移支持香港按照《基本法》和人大常委會有關決定的規定推動政改，同時推動政改，要符合本地實際，依法有序，更係罕地講到要有利居民的安居樂業，當然亦包括之前常提及的有利於香港社會的繁榮穩定，有利於維護國家的主權、安全同發展利益。

高人話其實呢番說話亦都係講俾有心人聽，好似有啲人話中央寸步不讓，其實都要反省吓訴求是否有利香港的實際情況，其中一個重點係香港特區的特殊情況，係一國之下的兩制，要普選特首，既有由下而上的，合資格五百多萬選民投票的實際情況；同時亦有由上而下的中央任命的實際情況，兩方都有權力，放諸其他地方都無呢個特殊情況，所以如果港人諗唔明呢個Point，普選係好難達至啦。

Ariel

** 博客文章文責自負,不代表本公司立場 **

特首CY今早到中南海紫光閣見總理李克強，本來呢啲會面之前的拍照時段都無乜料到，怎知今次克強總理有嘢講喎。

通常呢啲會面俾記者拍攝時，都係總理講一段，CY講一段，但當CY講到過去一年香港發展及感謝中央支持時，提及「尤其是滬港通開通這個問題上，得到總理親自關懷和支持…」呢個時候，克強總理即時笑起來，未等CY繼續講落去，就插話「這是去年你見我時，第一個(談)的事情，如期還是實現了。」CY答：「十月十七日實現了，到現在一個多月了，得到…」未講完，總理又再插話，並一路講一路打手勢：「(當時)我說的是年內嘛，(一)年內開通！」

(影片3分46秒後講滬港通)

 

這個總理許諾「滬港通一年內開通」的說法，真係第一次聽到，這也解開了一點疑團。10月佔中高峰時，滬港通一度停車，後來特首一上京提起，滬港通又重新開車。表面看起來，是CY上京催促之功，但現在看來，還有總理「一年之諾」，即係話滬港通是克強總理的BB，總理都唔想滬港通停咁耐，所以CY一講，馬上又開車。克強總理今次借見CY之機，重提滬港通之諾，客觀上都攞晒彩啦。

事後去睇，滬港通根本就是內地借股市催谷經濟大計的一部份，滬港通通車後，人民銀行在11月中就減息，內地A股馬上生番，也托起香港的H股。內地經濟疲軟，第4季有數要追，谷起內地股市，令市場感覺熱啲，有利國務院盡最後努力追追數，所以滬港通也不是單方面利港措施，而係內地融通經濟大計的一環，難怪克強總理如此上心了。