政府本周三啟動第二輪政改諮詢，學民仔搶先出招，學民思潮黃之鋒昨日宣佈未來爭普選大計，向四位曾經就青年及政改問題發言的政界大孖沙，包括全國政協常委唐英年、行會召集人林煥光、全國港區人大代表陳智思，前財政司司長梁錦松發電郵，邀約佢地公開會面，探討重啟政改的可能性咁話。
今早見到有報紙大字標題話:「學民邀政壇四名人談政改，唐英年或考慮會面」。心諗唐唐咁出位去玩呢個遊戲？
唐唐被學民欽點，皆因他講過社會爭拗越來越激烈，形容特首梁振英未能做到政通人和，學民仔話唐唐對現今的政治局面必定有看法，也有舉足輕重的影響力，期望會面表達意見。報道引述唐英年透過發言人指出，希望政改諮詢展開、了解內容及詳情後再作決定。睇回應唐唐係未決定接受與否，但亦未關上大門，報紙就當「或會面」。
政壇高人話，在佔中期間舉足輕重的學民思潮，過完運動又變番壓力團體，這種約四個重量級人物對話的「邀約」，同派「誠實豆沙包」一樣，本來唔預有乜回應，但佢地好識做宣傳，咁玩可以延續一個話題，至少呢啲名人往後出來時，記者都會叫佢地回應，唔應約都要解釋一番，講得不好或許還會俾傳媒笑一笑，咁學民仔都攞咗個彩，可以話「睇你班友幾細膽，平時同記者吹水就天下無敵，同我對吓話都有心無力」。
高人話，千祈唔好以為既然拒絕咁煩，不如同班學生仔對吓話算啦，仲可以順便隊吓CY抽抽水嘛。對話要睇水平，學民仔講嘢水平其實好高架，同佢地對話，首先俾借咗來做宣傳，延續佢地佔中的話題。其次殘忍起上嚟唔單止唔多謝你，仲食住上潤你兩句抽埋你水，真係賠了夫人又折兵啦。仲有仲有，咁樣幫學民仔做宣傳，又唔知阿爺會點睇呢又？
Ariel
** 博客文章文責自負,不代表本公司立場 **
