林鄭10蚊都無

政務司司長林鄭牽頭開展第二階段政改諮詢，文件羅列特首普選的方案，本質係「易入難出」，易入閘，難出閘，攞唔到提名委員會過半數出唔到閘做候選人，呢啲都係事前已經講晒。

到底點樣描述特區政府而家的處境？民主黨的張文光周日在電台節目上話，10年前許仕仁做政務司司長時搞政改，同民主黨講佢袋裏只有20蚊，無乜同泛民討價還價的條件。張文話，而家睇林鄭，連20蚊都無，得10蚊。佢估計政改方案過唔到，大家要再等10年(佢假設呢個年份可能因為習近平會執政10年)。

政壇高人話，張文話林鄭有10蚊，佢認為林鄭10蚊都無，而且佢個袋係透明袋，裏面有幾多錢一目了然，因為人大常委會8.31框架定死咗，不會變。中央的原則不能變，一變，會大亂。

有人話，阿爺若對政改寸步不讓，政改不能通過，不通過政府就不能管治。高人就對「不能管治」呢個說法好唔認同，話當年曾蔭權又係咁講，話過唔到不能管治，佢不如辭職，結果中央夾硬接受咗超級區議會方案。如今中央唔再信「不能管治」這一套，泛民在佔中時露了底，佔中咁不能管治的局面，都捱過了，還有更不能管治的處境嗎？佢話中央打定輸數，就係咁多，過不到，就等5年吧，但等5年、10年，再上枱還是同一個方案。

Ariel

** 博客文章文責自負,不代表本公司立場 **

警方對佔中組織者「預約拘捕」繼續，有組織罪案及三合會調查科（O記）預約了的頭面人物包括壹傳媒老細肥佬黎，學聯常委梁麗幗、學民思潮召集人黃之鋒，佔中三子則仍未收到警方電話，相信只係時間問題。

大部份涉案人安排在本月16日到警署問話，共6人。黃之鋒昨日問來電的O記探員，今次被捕是否只涉及一項控罪，對方稱：「可能會後加罪行，夾埋就有幾條罪。」黃之鋒話無悔在街頭抗命，準備迎接「瘋狂在法庭和警局遊走的日子」。

肥佬黎一度離港到台北，他昨日由台北返抵本港後對蘋果日報記者證實，前日香港同事向他轉達警方曾嘗試聯絡他。至於會否回覆警方或到警署接受拘捕，他表示須與律師商討。

記者問他會否擔心，他苦笑道：「有乜好擔心吖。」 政壇口痕友話，肥佬個老友係資深大狀李馬丁，乜法律意見都有，肥佬之前亦做晒辭壹傳媒職位的部署，而家真係唔使擔心喎。

真係話驚的只有在運動中已辭去學民發言人的周庭，她在facebook上話「其實我好驚」，但不會忘記抗命者的責任。