Auntie Uncle你懂的

學民思潮召集人黃之鋒昨早去完電台節目，在通道上遇到緊接上節目的政務司司長林鄭。之鋒當然唔會錯過呢個出位機會，之前佢都送過吹氣錘仔和高官公開試成績表俾林鄭，今次就準備了一份考評局通識科評核表嚟招呼佢。可惜林鄭以趕住開咪為由急急腳離開，唔想陪之鋒玩。

黃之鋒事後在自己facebook講番當時情況，叫林鄭為Auntie Carrie，順便大鬧民情報告連中學生通識科的研究「報告」都不如，若以通識科的評分標準，最多只能得一至三分。

Ariel反而覺得批評無壞，倒是呢個auntie稱謂比較剌耳，記得佔中時，三子之一陳健民在回校教書後接受訪問，就透露被學民等稱為uncle，透露雙方溝通有問題，或者係好少溝通。

睇嚟呢啲auntie 、uncle的稱呼，屬於「你懂的」範疇，同「強國人」屬同一類別，有少少諷剌味道，即係話你呢啲上一代人過咗時啦。不過之鋒好公平，佢呢啲稱呼唔止招呼對家，亦招呼自己人，你睇佢在訪問時點講卿姐、仁哥和檢基哥就知啦。

Ariel

** 博客文章文責自負,不代表本公司立場 **

佔中過後，民意又走回常態，在佔中時一度激發反對「袋住先」(即支持政府政改方案)民意，正在回落。珠海學院新聞及傳播學系一項民調顯示，有近半受訪巿民贊成政改「袋住先」。

珠海新聞系上月以電話訪問約一千名18歲以上的市民，當中約48%人傾向接受政改「袋住先」，在人大框架內爭取更多民主空間；約38%受訪者則表示拒絕接受任何框架制約特首選舉。調查亦發現，較年青組群反對「袋住先」仍然較多，在年齡介乎18至39歲的組別當中，53%不接受人大框架，願意「袋住先」的則佔47%。

這個結果同各大黨私下做的調查接近，在佔中初發動、警方射催淚彈後，反對「袋住先」的民意一度佔先，但隨著佔中收檔，而家支持「袋住先」的民意又佔番近5成的多數。

泛民政黨公開聲言不做民調，叫政府速戰速決，唔好講咁多嘢，快啲攞方案俾佢地否決，相信就是不想夜長夢多，以免愈拖支持「袋住先」的民意愈來愈多，會令佢地更被動。佢地明顯係想唔理民意，無論如何都否決政改方案。