誠哥好強調支持通過政改

長和系重組變身，誠哥親自見記者解畫，除咗公司重組，當然亦被記者問到是否支持政改方案按人大常委框架通過，誠哥都有備而來啦，佢話「如果政改唔行多一步，原地踏步的時候，對香港的損害，是無可估計的，因為政制一定要進一步，如唔行前一步，香港人全部都係大輸家，你同我都一樣。」

誠哥對呢個問題好有睇法，詳細咁講，進一步解釋點解希望政制向前行：「行多一步，最低限度，我哋第一次，香港人一人一票去選特首，選時你有三人可以俾你選擇，任何情況都希望政改能夠過，如果唔過，有咩嘢好處，我就睇唔出。以我個人來講，對呢方面我睇得好重，你冇第一步，何來第二步，何來民主進展呢？所以難得有咁的機會，希望我哋政改通過。」

誠哥見記者一向都係金句多多，今次見記者講到政改，「大輸家」呢個詞重申咗多次，都好強調政制原地踏步，香港人齊齊變大輸家，仲強調「你同我都係輸家」，睇嚟佢真係好支持政府，希望政改方案可以通過喎。

政改係特區政府當前頭等要務，誠哥咁幫口，都算好俾面政府啦。

Ariel

** 博客文章文責自負,不代表本公司立場 **

民主黨立法會議員何俊仁宣布在政改方案表決後請辭，引發變相公投。此建議應只係民主黨自度，無同其他泛民廣泛磋商，結果出嚟建制派未鬧得好厲害，溫和及激進的泛民已齊齊鬧爆。

溫和派如公民黨立法會議員湯家驊話感到錯愕，泛民本星期已召開3次會議，但並無聽過有關消息，佢認為咁做並無任何作用。

激啲那一班個個都發炮。佔中時曾力推公投的學民黃之鋒亦質疑，在政改表決後才辭職，還能否向政府施壓。新民主同盟立法會議員范國威話，現時才部署辭職公投，已經太遲，時機已過，他相信民主黨這樣做，是考慮到日後的選舉情況。

人民力量主席袁彌明就在個人fb個人專頁留言，話不要將公投變成一個黨內交棒或宣傳策略。假如辭職公投，希望由學聯或者學民成員擔任補選候選人，吸取最多市民支持。

仁哥呢一招「投票後」辭職最騎呢，事前又完全唔同其他泛民傾，令人懷疑民主黨為選舉宣傳而玩嘢，都唔怪得人咁諗喎。