潮流興玩手機Apps(流動應用程式),貴為民意代表的立法會又點會落後於人!立法會秘書長陳維安同傳媒聚會,就滿肚密圈,話準備推出Apps同埋youtube頻道,「低頭一族」最快下星期就會開到自己的YouTube專用頻道。
據講立法會做蘋果ios和Android的app亦做得七七八八。如果立法會下星期三通過,ios又攪掂的話,好快就可以成事。到時會分幾期推行,先攪會議串流、立法會日程表,跟住玩睇相,如果議員同意的話,仲會將議員通訊錄放埋上去。
咪以為立法會的網頁咁多字,無乜人睇,原來都有不少知音人,特別係網上的影片直播有回帶功能,直情係傳媒的好拍檔,可以隨時翻睇片段,咁就唔會睇漏眼啦!
唔講唔知,呢個回帶功能設立原意,係俾阿曾主席,可以好似球證咁,即時返睇之前片段,睇清楚有無人犯規。以前要回帶睇DVD,而家就上網攪掂,方便埋記者,都可謂德政。
其實,近期各政府部門都積極推出Apps,搶攻低頭族,好似天文台咁,日前就推出新的「我的天文台」Apps同埋「天氣廣播站」頻道,直接向公眾發送天氣節目,當然就唔係賣靚仔靚女報天氣,而係賣專業。唔知遲啲立法會又會唔會秘練兵,搵啲議員粉墨登場,搶吓收視呢。
Ariel
** 博客文章文責自負,不代表本公司立場 **