立法會潮玩App & YouTube

潮流興玩手機Apps(流動應用程式)，貴為民意代表的立法會又點會落後於人！立法會秘書長陳維安同傳媒聚會，就滿肚密圈，話準備推出Apps同埋youtube頻道，「低頭一族」最快下星期就會開到自己的YouTube專用頻道。

據講立法會做蘋果ios和Android的app亦做得七七八八。如果立法會下星期三通過，ios又攪掂的話，好快就可以成事。到時會分幾期推行，先攪會議串流、立法會日程表，跟住玩睇相，如果議員同意的話，仲會將議員通訊錄放埋上去。

咪以為立法會的網頁咁多字，無乜人睇，原來都有不少知音人，特別係網上的影片直播有回帶功能，直情係傳媒的好拍檔，可以隨時翻睇片段，咁就唔會睇漏眼啦！

唔講唔知，呢個回帶功能設立原意，係俾阿曾主席，可以好似球證咁，即時返睇之前片段，睇清楚有無人犯規。以前要回帶睇DVD，而家就上網攪掂，方便埋記者，都可謂德政。

其實，近期各政府部門都積極推出Apps，搶攻低頭族，好似天文台咁，日前就推出新的「我的天文台」Apps同埋「天氣廣播站」頻道，直接向公眾發送天氣節目，當然就唔係賣靚仔靚女報天氣，而係賣專業。唔知遲啲立法會又會唔會秘練兵，搵啲議員粉墨登場，搶吓收視呢。

Ariel

** 博客文章文責自負,不代表本公司立場 **

我地逢七一、元旦都有遊行，慢慢都習慣曬，昨日也不例外，但細心留意今年不一樣，不是遊行不一樣，是政府的反應不一樣，政府變硬了。

 

過去遊行完特區政政府循例都會出吓聲明話會「尊重民意」，呢啲可以叫「扮好人」聲明，係軟招，今年也不例外，還更進一步，CY講到希望將來歷史書寫佢任內實現普選咁話。

 

不過特區政府也不是一味軟啦，在元旦遊行日，警方分兩次拘捕四個涉嫌未經許可下進入解放軍總部的示威人士，牌面分析係想傳出「犯法就拉你」的訊息。

 

這還不止，港澳辦在晚上9時左右通過新華社表達強硬立場，指中央政府嚴重關注擅自闖軍營行為，理應受法律懲處。港澳辦在你遊行日發表強硬聲明，寓意就比警方拉人更明顯啦。明顯地傳出「你硬我更硬」的訊息。而且時間也選好，就等你遊行完集會人群基本散曬時才出，集會人士難有反應，但在新聞上就搶到晚上「缺貨」的空間。

 

今年係政改定案年，雙方一開局就「曬冷」，泛民、特別係激進派泛民擺明係寸步不讓，如今阿爺亦擺出同一陣式，真係要睇吓邊一方只係「二仔底」啦，可以肯定的是萬一打起上來，勢難善罷。