宣傳不足 內地客同年輕購物者不知著數優惠

呢個五一黃金周訪港旅客下跌情況比較突顯，旅遊業界事前由酒店訂房都估計到，所以搞咗個大型優惠救亡行動，優質旅遊服務協會聯同全港逾一萬間商戶，一周前開始，一連五周推咗個「開心著數大行動」，全港不同景點、零售店同餐廳有不同優惠，希望吸引旅客同本港居民消費。

不過，計劃推咗一周，睇新聞報道，原來唔少來港遊客根本聽都未聽過有著數計劃，零售店店員亦無主動向客人講解有優惠。例如有化妝品店買滿100元送30元現金券，以及可半價換購山頂蠟像館門票，有深圳來的遊客去幫襯時話，在內地都無聽過有呢個優惠計劃的宣傳，認為「但你不主動說，好像做了等於沒做一樣。」另外本地購物者亦話，無聽過呢個計劃。

有參與的百貨店亦無貼出參與咗計劃的標誌，客人主動問到時店員先答嘴，而一啲參加咗的連鎖店主動向顧客介紹信用卡折扣優惠，但相關活動優惠詳情則在店內角落處以單張展示。

過萬間商戶參與的著數優惠，本來都應該搞到興烚烚先啱架，但計劃最想吸引的內地旅客以及本港年輕購物者就好似唔多知道，正如遊客所講宣傳不足，真有啲「雷聲大、雨點少」的情況，難得有咁多商戶參與，搞手都應該再度吓橋，在未來四個星期，大力啲、聚焦啲谷吓個活動，至緊要係宣傳訊息去到最想吸引的人群。

Ariel

** 博客文章文責自負,不代表本公司立場 **

假期前在太古東隅酒店的Feast餐廳見到財經名嘴周顯，聽聞他搞六合彩報，就問佢兩句搞邊科。

周顯講起有個報壇前輩有份六合彩報想出讓，同佢傾起，周顯話不如份報紙作價500萬，他出100萬，佔兩成股權細細注玩吓。但對方想沽清，初時講500萬，最後話350萬，周顯諗過都係唔制，抽起咗條筋，話不如自己搞，就生起搞份報紙的念頭，講六合彩、講股票、講波。

佢份報紙叫《六合投資王》，初時每週一至二期，慢慢想搞成日報，到時改名叫《六合投資日報》，初時每期3、5千份，希望愈做愈大咁話。

周顯仲搞鬼到要請個政治記者，到時跑吓政治新聞，佢話唔係賭報地位好啲，人地要俾吓面、俾吓錢，落啲廣告喎。

雖然份嘢叫六合彩報，但周顯強項係炒股，佢話想整個欄每日炒一股，實行食住個市，每期推一股份，希望帶起份報紙咁話。

呢個時勢，做報紙的叫苦連天，話讀者廣告流失，但周顯咁反潮流出收費報紙，古惑的他自然有其盤算，唔使諗都係從股市中去打主意，只要個股市旺落去，做呢啲貼士報，都唔難搵到老細支持呀。