Mayanne綜藝出色，拍劇都好有觀眾緣！
TVB台慶劇《使徒行者3》熱播中，新一輯有不少新臉孔加盟。首集就有麥美恩客串飾演臥底Juicy，演出搶鏡，大獲觀眾好評。
本網記者攝
麥美恩形容劇中的她是一位直率又勇敢的女子，「我戲中飾演嘅角色係臥底朱倩Juicy，係一位稱職嘅好警察，佢一直以來都有團火想做臥底，所以爆seed就搵咗我，第一集就見到我喺天台，我嘅角色性格反應好快，又敏捷，其中一個任務講我要混入一間模特兒公司，拯救二寶，我諗都唔諗就去做，呢個角色幾得意，有一份真性情，應變能力強。去到第二集，我就俾人捉咗，而大家都見到最悲慘一幕，爆seed都好內疚，冇阻止佢行動。」
網上圖片
「我睇劇本覺得角色好有發揮，例如第一個任務係面對兩個嫖客Did少（陸永飾）及Done少（C君飾），農夫的搞笑演繹，加上嗰一場我又要淋水，好多笑位，而我造型都幾正，我諗係入行以來未試過著得咁少布！嗰一場好好玩，好突出，現場拍攝時農夫自由發揮好有火花，之後農夫提醒我淋水前要大聲叫一下，原來目的係想我有決心完成整件事，最後仲有我鯨魚式噴水，一take搞掂，出來的效果都好完美！」
網上圖片
對於第二集Juicy被活摘器官而死，Mayanne在演喊戲前亦做足功課，「上年尾在屋企有時間追看歐美電視劇《Game of Thrones》（《權力遊戲》），我就一次過煲晒咁多季，睇到唔同女角色演喊戲的層次，而我當時選擇用一個冷靜、好凍又孤獨的情緒去表達，好幸運遇到爆seed林峯，佢好sweet咁同我講拍喊戲的秘訣，他指可以拍攝時在內心想著一首觸動情緒的歌，心中就響起第八季出現的配樂《The Night King》。」
網上圖片
網上圖片
不少觀眾都難捨Mayanne的角色匆匆離去，更期待她能以其他形式再次出場。Mayanne透露：「今次《使徒3 》的特色係好多彩蛋，好多拍攝片段會在網上分享，好多觀眾問凡點解一出場就在天台與爆seed相遇，其實仲有一場考驗係我要在九龍城跟蹤爆seed，佢仲係浴足店幫我按腳，呢場戲有唔少動作戲同搞笑戲，重現被剪走的鏡頭畫面。還有一場未曝光的劇情係我同爆seed對打，公司專程set了一個綠佈景廠，擺了4架車，我仲第一次嘗試開真槍，講述我要殺爆seed，我還要專誠上武指堂，學打筋斗，還幫我準備了一個替身，我仲揸雙槍成個Angelina Jolie咁，拍到我好勁，出嚟嘅效果都好正！」
本網記者攝
Mayanne坦言自首兩集播映後，社交平台已累積網民排山倒海式的留言，向她予以支持和讚賞。「隔咗一後時間再拍劇可以pick up返，有觀眾見到我嘅進步，感動到佢哋，已經好開心。當然自己會再挑剔一些細節位，例如對白節奏，眼神多少，自己會再留意多啲，始終演員係要浸嘅，要靠經驗累積，所以總括嚟講（拍攝《使徒3 》）係開心同滿意嘅，但仲要努力鞭策自己，再做好啲！」
本網記者攝
本網記者攝
Venue : Amelia Hong Kong
