一張不可以俾老闆睇的相

國務院總理李克強星期日去到天津爆炸區，由於距離爆炸已隔幾日， 記者都走得七七八八，剩番有線電視派咗一隊人留守天津， 記者陳遠東在泰達醫院等緊時，竟然遇上克強總理，即刻上前扑咪， 搵總理講咗幾句，變咗全行獨家。

唔知係唔係鳯凰做唔到詐型， 後來官方再叫在場的外地記者訪採總理，有線做完又做， 鳯凰就補番鑊，其他香港電視台無人留守想補都補唔到。

呢啲外派採訪好貴，電視台做兩日即走好正常， 最後漏咗段總理訪問都無計。不過有線記者陳遠東訪問總理張相， 就引起傳媒行家竊竊私語，只見佢一手揸iPhone拍片， 另一隻手揸咪，睇真啲枝咪連線都無，只是做吓樣見吓咪牌， 實情係用iPhone收聲，係一個one man band殺晒的格局。

有傳媒行家話，呢張相唔可以俾老闆睇，否則佢地一定會問， 既然一個記者可以殺晒，點解次次出埠仲要一個記者、 一個攝影記者加一個工程人員呢? 那些年一定要用大部Beta機拍片，又要用衛星送片， 所以必定要三人行; 而家手機都影到好高清，iPhone都可以傳片，咁三人出埠， 又是否過咗時呢?

電視台記者興做「扒」，即係記者出現鏡頭前講幾句， 外國已經有記者用自拍神棍或腳架拍自己做扒，做扒也不用攝記。 恐怕這個情景，將來也會在香港出現啦。

《今日美國報》有條片敎人如何用智能手機變身城市記者：

http://www.usatoday.com/story/tech/2015/05/07/how-to-be-a-citizen-journalist-with-your-smartphone/26453219/

小鯊

** 博客文章文責自負,不代表本公司立場 **

《新報》結業，令人唏噓。《新報》1959年由羅斌創辦， 唔好以為佢未威過，80年代《新報》曾經好紅， 當年有一天小鯊走入深水埗一間茶餐廳，見到枱枱都有人攞住份《 新報》，其他大報影都唔見，馬上買份睇睇，原來當時《新報》 甜版大加料，吸引了一眾低下階層讀者。

《新報》甜版當年已經出美女大相，創了先河。其實佢唔止甜版勁， 甜故都好得，有個甜故叫「威威李私記」，講一個花花公子溝女事件，當年有好多捧場客。

《新報》另一招係大搞炒股版，首創一個「百萬倉」， 專點細股莊家股，每日公布倉位變化， 即係100萬本賺到1000幾萬嗰隻，睇到散戶如痴如醉，讀者賺唔賺到錢唔知，但係報紙就好賣得。《新報》 高峰期曾衝擊第二位的《成報》的位置，主要食甜版、 炒股版和馬經三大瓣。

不過踏入90年代，《新報》走勢已放緩， 1992年易手予英皇老闆楊受成。《蘋果日報》 在1995年創刊之後，搶走大量業界稱為「愛睇黃賭毒」的讀者， 《新報》就開始走下坡。

昨日《新報》社長顧堯坤話，《新報》面對長期虧損，虧蝕唔係講緊 3、5年，係一個好驚人的數字。

聞說《新報》少少地一年都要輸2000多萬， 衰起上來更不止此數。你睇《新報》最後員工得番130人， 以一間報舘來說是很少的數字，大型報館員工過1000人， 中型報館員工都有500幾人，《新報》得番130人， 已經係斬到見骨的數字，如果斬到咁都要蝕2000萬， 收入真係好少，再加上紙媒衰落的大形勢，真係除咗執咗佢， 都無乜辦法可想。