膠仔曾經同大家分享過安全套發展簡史，提到19世紀時有人會用綿羊盲腸製作安全套。最近外國創意網站io9兩名策展人根據早前佢哋發現嘅「19世紀安全套配方」製作出一個羊腸安全套。所謂心動不如行動，而家就學吓點整啦！
九月份時，io9策展人Esther Inglis-Arkell無意間喺1844年出版嘅《美國實用秘方大全》（The United States Practical Receipt Book）一書中搵到維多利亞時代嘅安全套配方。以下影片中穿着白衫嘅Katharine Trendacosta同埋着藍衫嘅Diame Kelly對秘方進行小改動，再嘗試制作一個羊腸安全套，發現要整個咁嘅套非常困難，過程中用到嘅化學物料仲有可能會傷到自己！
先睇原本配方：
1）取出綿羊盲腸泡在水中，四至五小時翻一翻，重複五、六次；
2）用低濃度梳打水重複第一步；
3）用釘將表面黏膜刮走；
4）經硫磺處理後用清水洗淨，再用番梘水浸；
5）沖洗乾淨後等佢膨脹、晾乾；
6）根據所需長度剪裁；
7）喺末端加上一條繩。
Katharine 同埋Diame問個羊場拎到條綿羊盲腸，按照秘方將盲腸放在梘液中浸咗好長時間，然後用牛油刀代替釘子，以及用焦亞硫酸鈉溶液代替硫磺，製出一個百幾年前啲人會用嘅避孕套。佢哋最後將成品套上一碌香蕉，同現代安全套對比。佢哋話個羊腸套摸落滑嘟嘟，外觀同現代套套差唔多，分別在於要加條繩先用得。
神州快訊
** 博客文章文責自負,不代表本公司立場 **
膠仔媽咪家鄉喺四川，加上老竇曾去湖南做過幾年嘢，兩個非常食得辣。受父母影響，我同樣無辣不歡，而且食得幾辣。曾有同事問我：「食咁辣第二日去廁所唔辛苦嘅咩？」講真我唔覺喎，但又唔知點解，直到最近睇到篇文先明白，原來係我訓練有素。
泰國朱拉隆功大學腸胃專家Sutep Gonlachanvit教授話，任何人最初食辣都有可能出現直腸過敏，即係肛門燒灼痛，並且經常想去廁所；但係如果連續食辣三星期，大部份人都會脫敏（desensitization），降低直腸受刺激嘅感覺。佢曾做過研究，所有參與研究嘅人每日進食2.1克辣椒，即係大約1.25茶匙咁多啫，已經有類似效果。膠仔建議大家試試呢招，話晒「訓練」過程唔算太辛苦，當然都要視乎你本人有幾食得辣。
之後講講關於辣嘅小知識。美國神經科學家Rose Eveleth曾經喺YouTube TED-ED頻道話過辣其實唔係味道而係疼痛感，因食物特殊化學物質刺激感溫神經而起。腸腹專家Luigi Basso博士接受外國健康資訊網站《Men's Health》訪問時又強調，辣分子唔係營養，無法被身體分解或吸收，所以排便時會刺激到肛門。佢補充肛門細胞結構其實同口腔好似，辣分子攻擊完口腔之後，會再喺Pat pat引起類似反應。
俾條片你睇：
原文有另外兩招教大家如何為屁股消去燒灼感。第一式係食辣時盡量揀啲脂肪含量低嘅食物，因為分解脂肪時產生嘅膽汁酸鹽會進一步刺激肛門四周皮膚，令你菊花燒得更旺。若然真係抵受唔住誘惑要食高脂肪食品，餐後即刻服用含有洋車前子（psyllium）嘅纖維補充劑。洋車前子素有「纖維王」之稱，可以幫助排便，仲可以吸收大量油份排出體外，減少膽汁酸鹽分泌。換句話說，呢招係要減少肥膩嘢對肛門嘅壓力，可取嘅。
第二式係痾完屎後即刻洗屁股。專家話去完廁所之後，以性質溫和嘅番梘同暖水沖洗，之後搽少少潤膚膏，咁樣可以紓緩疼痛感。講真，膠仔寧可忍受一陣辣辣哋都唔想又要沖又要搽藥膏咁麻煩，係原文講到好緊要咁我先講埋架咋。
補埋原文：
http://www.menshealth.com/health/burning-butt
