相由心生

相由心生
作者： 爵士

樣貌是父母送給我們的第一份禮物，一出世就會說「你似媽咪定爸爸多啲？」所以很多人都覺得面相是『整定』，事實是否如此？

面相有很多「加分」部件

例如：「耳仔」高過眉代表易在自己行業成名，額高和廣代表少年運比較順利（年輕時易上位）；眼尾有紋比較受歡迎（做對客工作有利）；眼有神（更加有助一生運勢）；鼻直和長中年運順利（女士多嫁有成的老公、男士中年運和事業順利啲）；顴骨高（有管理力）；面有粉絲紋（有助人緣）；下巴有肉（做事都順啲和有下屬助力）。

看一看名人或明星們，很多都有不少這些部件。但如果我們沒有這些加分部件，是否代表「無運行」？ 當然不是啦。

我們都知道「相由心生」四個字。性格和生活態度就會長時間改變面相（代表 - 恆態）。久而久之，面相會改變。

我們常常聽「一命、二運、三風水、四積陰德、五讀書」。「命和運」當然未必百分之百掌握在手，「風水」當然可以找位「好」的風水師傅助旺自己才。餘下二項就能掌握在自己手上。

「積陰德就等於做善事」只要有善念就可以。 很多人一想到做善事，會有好多藉口「我好忙架，邊有咁多時間做義工。」，其實我哋唔需要將做善事諗到「咁大和咁難」，其實，簡單啲 「一個笑容、一句多謝、拉門、講句早晨、買旗等等」。

小事都可以是善行。實例是「法令入口」是「滕蛇入口（餓死街頭）」，有這種法令紋可能有「食道癌、喉嚨痛」。但如果你做得善事多，會令騰蛇入口延長，變成「蛟龍出海」代表健康長壽，面相就會改變了。

另外，讀書就更加唔洗講！ 幾多成功人士每天必用時間來閱讀。 就知道「讀書」的重要。 一天抽一個特定時間睇下書，真的對自己有幫助。

引用老師一句話「八字是人生的綱，細節靠自己」，我哋每天需要做千萬個決定，善念做出善行，思想（多讀書）也改變了行為，行為改變了態度和做人的深度（恆態），久而久之，面相必定會改變。

香港兔蘆術數學會

** 博客文章文責自負,不代表本公司立場 **

騙子 （文王卦占測實證）
作者：蕭生

今次唔講賭博，但都係講錢，早前有位女友人T小姐在網上交友軟件認識咗一位男士。

大家有傾有講，甚為愉快，就相約出嚟見面，但男方話自己現在唔喺香港，要7月尾先嚟到，女友人就問我呢段關係有無將來，我就話不如占支卦睇吓有咩啟示。

第一眼就睇到妻財世爻落空亡，唔係一個好兆頭，我就問佢，你係唔係對呢段關係都無咩信心？

之後佢就話因為只係網上認識，所以都無咩信心，只係一半一半。再睇其他爻，全支卦得二爻發動，吉凶相信可在此中尋，玄武兄弟寅木化兄弟卯木，非常有力去剋世爻，兄弟發動有破財意味。

我就提醒佢小心錢銀問題，因為我認識T小姐一段時間，知道佢對錢銀好重視，所以我估計就算佢哋真係發展，配合支卦提示，將來都一定會因錢銀鬧反。

再睇用神官鬼，坐五爻，有上爻未土暗動生，似係有能力之人，但可惜值日為丑土，用神入墓，呢位男士嘅能力大大打折扣。

之後我再問深入一點關於這個男人嘅資料，原來男子為馬拉人，做生意，預計7月尾會嚟香港發展。因為官鬼入墓，我就話你未必會見到佢喎，另外玄武臨兄弟爻發動剋世爻妻財，主欺詐、欺騙。

我就大膽同佢講呢個男人可能係騙子。既然係騙子，自然同破財有關，更加唔會有機會見到真人，咁成個故事就可以完整串連。之後我就同佢講，7月尾好快到，到時睇吓結果係點啦。

殊不知二爻寅木化卯木呢個進神真係好快畀答案T小姐，大約喺占卦後不足一星期收到消息，個男人同佢講因為疫情關係，7月嚟唔到香港，但因為已經調咗大量錢嚟香港，引致警方懷疑佢洗黑錢，凍結咗佢喺香港嘅戶口，佢而家周轉不靈，想問T小姐借幾萬蚊周轉。

上面都提過T小姐對錢非常重視，所以一蚊都無損失過，但同時打沉咗佢嘅愛情夢，佢之後非常失落。唔知佢係因為失落定唔好意思同我講，其實個結果唔係T小姐同我講，而係蕭太話返畀我知，蕭太先係佢朋友。

當日占完之後，蕭太話返畀我知其實T小姐係有懷疑我嘅說話，佢係唔太相信，但我都無嘢可以再做，只有等睇結果。都唔知係好彩定唔好彩，畀我不幸言中，不過經始一卦，令我更加深感受到卦神嘅利害。