習大大(內地網民對習近平的暱稱)果然厲害，原來四、五歲已經識游水，他接受俄羅斯電視台訪問，自爆好鐘意體育運動，包括游水同爬山等：
「說到體育活動，我喜歡游泳、爬山等運動，游泳我四五歲就學會了。我還喜歡足球、排球、籃球、網球、武術等運動。冰雪項目中，我愛看冰球、速滑、花樣滑冰、雪地技巧。特別是冰球，這項運動不僅需要個人力量和技巧，也需要團隊配合和協作，是很好的運動。」(新華網)
習大大愛踢波，已經係公開的事，每次接受訪問或到海外演講都毫不掩飾對足球運動的感情，曾經講過三個足球夢，就是中國隊打入世界盃決賽周、中國辦世界盃，最後當然仲想中國捧世界杯。
圖片來源：新華網
前兩日就對住新任中國足協主席蔡振華話：「你現在掛帥足協，我們拭目以待」。內地網民即刻熱議，話呢次蔡振華壓力大囉，之前一直備受黑哨困擾的中國足球壇，要實現習大大的足球夢，非要大力改革不可啦。
除了足球，習大大鐘意游水都成日掛在嘴邊，上次訪美時，同奧巴馬散步時話自己每日游一千米，點知翻譯姐姐譯咗一萬米，奧巴馬的表情嚇咗一嚇，搞出小笑話。有認識在海裡人(在中南海工作的人)的朋友話，聽聞習大大真係熱愛游水，自入中南海後，幾乎日日早上都會BOOK池游水架。
做咗大領導，習大大在訪問中亦感慨自己的「時間都去哪兒了」，呢幾個字係一首歌名，去年在內地熱爆，被人話係催淚親情歌，連帶唱歌的王錚亮都走紅，受邀上埋中央電視台的春晚。
「談到愛好，我個人愛好閱讀、看電影、旅遊、散步。你知道，承擔我這樣的工作，基本上沒有自己的時間。今年春節期間，中國有一首歌，叫《時間都去哪兒了》。對我來說，問題在於我個人的時間都去哪兒了？當然是都被工作佔去了。現在，我經常能做到的是讀書，讀書已成了我的一種生活方式。讀書可以讓人保持思想活力，讓人得到智慧啟發，讓人滋養浩然之氣。比如，我讀過很多俄羅斯作家的作品，如克雷洛夫、普希金、果戈里、萊蒙托夫、屠格涅夫、陀思妥耶夫斯基、涅克拉索夫、車爾尼雪夫斯基、托爾斯泰、契訶夫、肖洛霍夫，他們書中許多精彩章節和情節我都記得很清楚。」(新華網)
都話習大大係高手，耐唔耐自爆吓自己小小「秘密」，出巡時又食吓平民餐，不經意講兩句時下內地最流行的用語或者點番首歌，即刻拉近同百姓的距離。
講開習大大的風格，諗起一件小事，話說習大大入咗中央，準備接班，首次以國家副主席身份出訪，港媒都有跟住採訪，外交部新聞司安排咗一次他坐定定接受港記提問。
入到間房，新聞司官員好自然想將他引到在座位前的記者準備介紹，點知習大大一入房就望到站在後排預備拍攝的攝影師們，於是同新聞司講先同攝影師握吓手先，然後就自己走咗過去，攝影師個個右手都攞住部機影緊他，搞咗好耐先握到手，場面都有少少尷尬，習大大慢慢等仲笑笑口咁話：你們很敬業呀。冧到啲攝影師笑晒。
圖片來源：巴士的報
由小處見到，習大大真係高手嚟架。
Ariel
** 博客文章文責自負,不代表本公司立場 **
鄉議局搞組黨，政界有人解讀係不滿CY忽視鄉議局的權益，仲話鄉議局到北京「告御狀」。鄉議局啲頭頭出來解畫，解解吓，再炒番熱特首辦退回鄉議局刊物《鄉情》單嘢。
呢單嘢去年年底鄉議局會議提過，話收到特首辦去信鄉議局，基於環保原則，退番之餘，叫佢哋日後唔好寄刊物《鄉情》俾CY。聞說班鄉親個心就唔係太舒服，覺得有人唔識印刷，一印就成批印，唔會因為CY攞少一本就可以印少一本，但局內主流意見都認為係小一事一樁，無謂再炒作，點知最近又被熱炒。
雖然副主席林偉強就話理解，但有鄉事成員仍然唔多like呢件事，批評退回刊物令部分人感到唔舒服，若有環保理念，應該一視同仁對待其他相關物品。
有近接政府的口痕友聽完即刻有反應，話啲鄉事抱怨特首辦退刊物，其實好多紀念刊物，例如百年報紙紀念、五十年紀念特刊等全部退回。仲有出席活動唔帶襟花，話呢啲係簡約、環保新規定，政府上場時早就如此，不但特首其它司局長都一樣退。覺得班鄉紳咁講會俾人感覺有啲老土。
其實小小一本刊物咁易又炒番熱，主因都係外界一直認為，由僭建、大浪西灣郊野用地處理、到堆填區處理等議題，CY加埋林鄭同班鄉紳一直都唔係咁對嘴，鄉議局一話組黨，難免令人有解讀。
