即將在下周日（13日）晚舉行的《萬千星輝頒獎典禮》，最受注目獎項當然是「最佳男主角」，事關有兩屆影帝黃秋生、三屆視帝黎耀祥，以及剛在新、馬兩地頒獎禮都奪得視帝寶座的陳展鵬競爭。展鵬對自己都有信心，又承認對手太強，形容有點「打大佬」的感覺。
展鵬憑《張保仔》的「十一貝勒」第四度獲提名「最佳男主角」，由於早前先後在新加坡的《星和無線電視大獎》和馬來西亞的《星光薈萃頒獎典禮》奪得「最喜愛男主角」。《頭條日報》日前與展鵬傾幾句，他透露對於儲齊大滿貫他信心大增，一直等緊期待嘅嘢終於發生，就好似初戀感覺咁，以前未試過呢種坐立不安，心如鹿撞嘅感覺，真係有幾晚瞓唔着㗎！好似唔知對方點諗，但最終有個肯定囉！」
網上圖片
今次的對手大部份是前輩級，展鵬承認有「打大佬」感覺，「老中青都有，秋生哥就當然超晒班啦！影帝級仲有三屆視帝祥哥，又有Bobby（歐陽震華）同湯（鎮業）哥佢哋，個個都咁厲害。我『十一貝勒』呢個英雄，今次要大戰梟雄啦！真係好似打機打大佬咁㗎！輸就梗㗎啦！但贏到特別開心囉！自己喺海外攞咗，當然想返到嚟都有認同啦！」
早前有指蔡思貝將車停在展鵬住所而傳出緋聞，但展鵬講到若得獎後會有何新目標，竟然話想搵老婆，「其實係媽咪提醒我，我喺海外得咗獎之後，佢話如果喺香港都有獎，都係時候諗啦！佢都好明白，我如果事業未上軌道，唔會諗呢樣嘢住，因為以前賴過嘢，要兼顧兩邊都做得唔好囉！（如果攞唔到呢？）咪再努力多一年先再諗囉！」
