講得仲要打得

阿爺推自由貿易區救經濟，喺區內做生意，有好多優惠，政策仲彈性過經濟特區。全國各地都爭做「自貿區」，爭到打崩頭。

粵港澳對外貿易經驗豐富，阿爺批嘅機會好大。港商素來眉精眼企，當然唔會錯過咁有著數的機會。近期頻頻北上，跑去廣州同領導打交道，睇睇有乜好路數。話說近期一個團上到廣州，拜會政治局委員、廣東省委書記胡春華交流吓，此小胡被稱為小胡錦濤，係團派六十後的希望。

除咗傾吓探討有冇合作機會，有機會接觸，當然可以了解吓政壇新星的「能量」啦。

講到點樣可以利用「粵港澳自貿區」創造三贏機會，港商們當仁不讓，七嘴八舌，一輪搶攻，發展什麼什麼中心啦，誠意好大，廢話亦唔少。

胡春華聽完各人意見，隨即系統地將紛亂雜陳的意見，拆骨重組，分門別類，總結歸納得井井有條，呢啲係中央政策，地方話唔到事，呢個意見好好，我哋考慮吓點落實呀，呢個建議有得諗，去邊個政策部門傾吓啦。聽得在場的人士滴晒汗，大讚小胡思路清晰，組織及綜合能力之高，令人佩服。

其實，大家唔使太過大驚小怪，內地官員，唔少都係記憶力超強，綜合組織能力一流，表達方面亦都訓練有素。小胡能夠成為兩位進入到權力核心的六十後政治委員之一，自有其過人本領，此番南下，能否為已發展到樽頸位的廣東殺出一條血路，就不單考驗小胡的綜合組織能力，還要擺平各種勢力，當然最不能少係視野同高層次。

能否帶領南大門再現改革先鋒之勢，呢場考試唔易呀。

Ariel

** 博客文章文責自負,不代表本公司立場 **

無記踏入馬年係威係勢，攞到冬奧運轉播權，唔知係咪樹大真係易招風，又係網民發揮創意的時候。

 

今日網上流傳一幅疑似冬奧運港隊代表呂品韜接受訪問時的電視截圖相片，介紹他的電視標題上赫然出現港英時代的標誌，而唔係特區區旗，惹來網民議論，笑言「港獨勢力抬頭」。

 

網上流傳版本

無綫提供的播出版本

 

 

本來網上流傳，炒熱一陣都可能過去，明報即時新聞網站就轉載呢段消息，指無記出錯。

 

傳媒自然打去無記問清楚，聽聞無記中人即刻翻箱倒籠，先去查吓到底係邊個節目，初時以為係新聞部，之後又再發現片段可能來自節目部，睇咗巡邏影片(錄低節目播出街的版本，以備處理有爭議事件)，驗明「正身」後，搵到出街時係正常的區旗標誌，仲發埋俾傳媒。

 

連帶出段聲明指明報即時新聞網的報道嚴重失實，深感遺憾。明報即時新聞組就對一度轉載惡搞消息，引起讀者誤解，表示歉意。

 

新年伊始，本來都會和和氣氣， 無記點解會異常高調呢，原來內部有感續牌公聽會舉行在即，下周一就會有第一次場，預咗會被追擊，唔想呢次事件俾人提升到涉嫌搞「港獨」呢啲政治議題上，所以高調出手，迅速斬欖。

 

免費電視發牌事件風波未了，又到現有兩間免費電視台續牌公聽會，睇嚟今年現實版的電視風雲，分分鐘鐘好睇過公仔箱裡面的劇集。