何浩文（Dominic）在新片《鴨王2》與唐紫睿（Hazel）等一班「晶女郎」合作，激烈程度不及第一集，但他仍與文凱玲（Connie）和林莉嫻（Leslie）「激戰」連場，他笑稱拍攝時專心演戲，未有生理反應，又大讚兩人努力和投入。
點擊看圖輯
Dominic透露今次以劇情為主，但他在電影繼續艷福不淺，先後與Leslie及Connie有埋身肉膊鏡頭：「其實我同林莉嫻激啲，有一場貨車上親暱嘅場面，比較刺激。我同Connie有場床戲。（拍戲時有冇生理反應？）其實唔會有，因為當你注意力去晒身體每一個部分嘅時候，唔會諗到呢一啲唔應該諗嘅嘢。手手腳腳都要演戲去表達一啲意思，你唔會將啲注意力集中喺一點，會分散喺唔同點，所以唔會有生理反應。」大家亦明白都是演戲一部分，不會感到尷尬。
Connie和Leslie誰令Dominic較難忘？Dominic說：「Leslie難忘啲，因為佢第一次拍戲，同埋我認識佢好淺。雖然同公司，但係同一個新人做啲比較激情嘅戲幾特別，因為佢唔係唔努力或者唔投入。」他指Leslie始終比較新，經驗比較少，有些事在配合上有少少碰撞。
Dominic透露從2014年開始規定自己NG不能多過三個take，否則要「萬歲」，直至今年亦未過破戒：「聽前輩講以前拍菲林嘅時侯，準備工作個個都會做，因為你一NG嘥菲林嘥人時間，劇組因為你一個而再要拍過嗰場戲。前輩話依家啲演員冇咗呢個覺悟。我聽完佢講我好大感觸，我心諗我係專業演員，就要做到專業呢兩個字。我做好功課做好本份係專業嘅一部分，我會令自己响拍攝之前做好嗰日拍攝需要嘅嘢，以最快最好嘅表現去演出。」
提到電影由原先的IIB級別變三級，他指是因為監製王晶想令故事更加暢順，故放棄IIB級別，自己亦不擔心票房：「唔係演員去擔心，演員只係演好角色同埋宣傳配合好已經足夠。票房唔到我哋控制。」
去年因為《鴨王》而與袁嘉敏（Candy）鬧不和，兩人更多次隔空駁火，Dominic重申無與對方不和，指Candy自己諗多咗：「我同佢冇乜點交流，冇乜點溝通，可以講唔識佢，點會無喇喇憎佢。（未有再聯絡？）你唔會去聯絡你一個唔識嘅人。」問到是否因為兩人的是非令王晶今集飛起Candy，Dominic指覺得她們（Leslie及Connie）適合角色，又暗串Candy說：「我好少搞是非，我覺得好無謂，人生有好多有意義嘢做，用啲時間喺嗰啲地方，代替講咁多是非。」
而Hazel指角色與上集不同，無性感戲份，希望以另一個形象見大家，坦言今次主力搞笑，戲中不時要欺負Connie及鍾采曦（Iris），搞笑重點場口放在她的身上。對於被稱為「晶女郎」，Hazel指已叫了兩年，已經很習慣亦不介意，認為是一個光榮。她稱知道公司簽了很多女藝人，直言良性競爭一定有，自己向武打影星方面發展：「依家我學功夫，希望殺出一條血路。如果個個走性感，變咗可能會僧多粥少。良性競爭會令大家更加進步。」
Connie看似較為得寵，Hazel稱不會不開心，又指王晶簽多個女仔，每人形象不同，安排不同戲路：「佢會覺得我係硬朗型多啲，同佢哋路線唔太一樣，文凱玲同Lesley型象一個比較柔弱啲，一個惹火啲。晶哥咁多電影都唔怕爭寵。」她稱除非有好劇本和有很好的發揮，否則暫時不會考慮露點。
唐紫睿 髮型：Haffman Cheng@L salon