"身邊人"會成永遠的謎嗎？

商台名嘴李慧玲突然被炒，引來政壇耳語，慧玲姐指有個識咗十年、梁振英身旁的人，叫她小心份工，她反問有無人身安全問題? 對方話「又唔去到咁地步，你做到某某(已離開商台的主持)就無問題，但如做到這樣我又唔聽你啦」。即時引發口痕友估到底邊個係「身邊人」。

 

猜謎遊戲呢兩日係咁傳，先係前新聞處處長、現任特首辦主任邱騰華，因為佢同慧玲姐認識多年，但特首辦就斷然否認。

 

李慧玲昨日又再指身邊人係一名「梁粉」，於是在CY競選期間的出力者包括羅范椒芬、張志剛、邵善波等都成涉嫌人，但當事人個個都否認。

 

咁慧玲姐話覺得對方是善意提醒，表明唔會公開對方身份，呢宗會唔會成為永遠的無頭公案呢？

 

講到另一個指控，話志雲大師曾為續牌事件向通訊局叩門，不獲理睬，商台為續牌跪低。除了商台話佢冤枉、志雲大師話佢指控荒謬，通訊局接受傳媒查詢時就話目前未收到有關商台申請，雙方未有就續牌事宜接觸….

 

唉，慧玲姐工又冇咗，仲要回應一個個反擊，玩落去，就要睇佢會唔會再爆料，同啲料弱定強喇。

 

巴士的團隊

Ariel

** 博客文章文責自負,不代表本公司立場 **

商台風雲繼續上演，到底志雲大師係咪真係騰雞殺手，搞到大老闆唔滿意，擺開佢，跟住就郁李慧玲呢，今日志雲大師喺商台的節目似乎可見端倪。

志雲大師今日最多人引用的內容係，反駁李慧玲的指控對佢人身攻擊和侮辱，批評對方有目的，企圖將事件關係到佢個人福祉及未完的官司，要求李慧玲提出確實證據。仲話對方的控非常荒謬，完全沒有事實根據，對他並不公平，亦對他的人格造成嚴重打擊，甚至侮辱，他對此深表遺憾。

講咁多，都集中在為自己平反，反而對商台是因為續牌而跪低的指控，回應得輕巧好多，指李慧玲在續牌問題上並非商台的阻力，亦不是考慮因素，公司在續牌方面不會有壓力，因為續牌是既定程序，相關條例亦有客觀準則。

唔知係咪已經唔係公司的管理層，志雲大師仲大大聲話，建議公司出來就事件交代，不單向外間交代，亦希望能向內部同事作出交代。唔講以為員工代表添。 相反商台總經理陳靜嫻出嚟回應時，強硬好多，指李慧玲指控無事實理據，亦極度不公平，不單對商台，亦對香港造成極大傷害，仲直接佢破壞雙方關係，嚴重影響團隊精神，就維護商台立場，發炮勁過志雲大師。

反觀志雲大師借住節目，更多係澄清自己個人的角式，盡力撇清事件同自己的關係，甚至建議公司出來交代，好明顯呢個不似外間其一個解讀，認為志雲仍有實權，只係為避過規限，唔以行政總裁身份去主持節目。

咁講法，另一個解讀，大老闆覺得佢處理李慧玲事件得唔好，想面面俱圓，結果兩面不討好，失落管理大權，呢個講法又好似近磅喎。