去海洋公園食美國熱狗？

海洋公園高層請食飯，席設園內的海龍王餐廳，Sebatian每次來呢度食飯都覺得好正，因為對住個超級大型嘅水族缸，有好多魚在外邊游來游去，感覺真係非常之relax，未去過嘅朋友一定要去吓。

海龍王餐廳有真正海洋景

今次食飯嘅主題菜係猴年新春套餐，四位用嘅套餐收1988元，食物相當豐富。不過臨場吸引左我嘅反而係海洋公園主席孔令成，特別推介嘅熱狗，孔主席發覺有隻美國紐約式Nathan牛肉腸好正，結果就特別叫海洋公園採購呢隻腸返嚟，做出一個熱狗餐。

Nathan牛肉腸套餐

由於只係試食，我只係食咗三分之一個熱狗，但係發覺呢種Nathan牛肉腸食落比較有咬口，雖然我唔係飲食專家，只能講「食腸有腸味」呢啲好行貨嘅評價，亦覺得幾好食，仲有三色醬料任加。

有同枱嘅朋友話，208元個熱狗餐，都唔係幾便宜。但我就認為，去海洋公園餐廳消費，又有來路腸、龍蝦沙律又有薯條啤酒，計落又唔貴喎。聽餐廳方面講，熱狗餐推出之後幾受歡迎，兩日買咗三百幾個餐。當然唔鍾意食熱狗餐就可以食正路嘅猴年新春套餐啦。

如果你喜歡飲食，海洋公園嘅印度菜搞得越嚟越正宗，海洋公園營業及事務執行總監李玲鳳話，由於印度嘅客人增長得好快，佢哋已經請咗兩個印度裔廚師，其中一個係香港土生土長。佢哋打算另外再從印度直接請一個廚師返嚟，做更正宗的印度口味菜式。

海洋公園高層齊賀年。海洋公園主席孔令成（中），營業及事務執行總監李玲鳳（右）。

過年去海洋公園仲可以睇下全球最細的馬騮，來自南美洲的侏狨和赤掌獠狨。侏狨身長只有12至15厘米，只有手掌大小。牠的頭顱可以180度轉動，非常有趣。

另外仲有花式溜冰騷睇。呢個騷聖誕都搞過，大受歡迎，為匯演編舞的Sarah Kawahara來頭唔嘢小，佢係2002年冬季奧運會開幕及閉幕式滑冰舞蹈設計師兼艾美獎得主，成個騷由世界級滑冰高手擔綱演出，施展空中高難度動作同溜冰特技，配合埋視覺效果，會令人好似置身萬花筒一樣，有七彩繽紛的感覺。

Sebastian

** 博客文章文責自負,不代表本公司立場 **

香港四面環海，仲有好靚的維多利亞港，但咪以為香港地人人識游水，有調查發現原來識游水的香港人少過一半，呢個比率同外國比都算低。好似澳洲，雖然內陸係大片沙漠，但全國八成人都識游水。

游水強身健體，唔單止係運動仲係求生技能，一旦跌咗落水都能夠保到命仔。所以家長們真係要諗諗係咪安排仔女學游水，游得唔叻唔緊要，但至少多樣求生技能傍身！

據聞馬會有見及此，即將推出新計劃，安排讀小一的小朋友免費學識游水，計劃初步諗住分三年進行，合共有一萬六千個名額，即係有一半小一學生有機會參加，馬會會同游泳總會合作，由康文署協調提供場地，等班小朋友唔駛錢就學到游水。

點為之學得識？聽聞會以識游20米為目標，呢個係水中求生的基本要求，跌落水可以救到自己﹔加上所有水上活動都要求參加者識游水，所以學識游水真係好有用。

小朋友成日被批評唔識照顧自己，有學校甚至要教學生如跌親時，教佢地用雙手保護自己，所以呢啲有得玩、有得傍身的游泳課程，相信亦會大受歡迎，這種慈善項目亦值得推廣。