今次冬奧出乎意外有睇頭，轉播的電視台率先受惠。
北京冬奧開幕幾日，中國在團體速滑險勝意大利隊，成為市民熱話。今次冬奧無綫開幕式全程直播，收視竟然逼近20點，主打播出的J2更創出收視破6點的佳績，這個成績連體育界都話跌到成地眼鏡碎。
阿爺精心搞作，開幕式有科技元素。
免費電視播冬奧，過去收視平平，有體育界大佬事前也坦言不敢看好，皆因近年本地體壇明星湧現，觀眾追捧選擇增多，結果在冬奧開幕前經過一輪催谷，氣氛快速升溫，有人馬後炮解釋，港人生活富裕，渡假去滑雪一早盛行，現在無得去旅行，睇睇冰上運動都算望梅止渴。
開幕式的「地面顯示系統」是世界最大LED屏幕，面積有10552平方米，屏幕上方有攝像頭捕演員的位置，電腦會實時反應。
小鯊就話阿爺精心搞冬奧省招牌，開幕式落重本高科技兼有創意，睇到大家都好好靚好特別，贏晒口碑，兼且吸埋收視。事過境遷，仲有人搵番無綫條片，話要射俾海外讀書的子女欣賞。
另外體育界原先對冬奧收視有保留，皆因冰雪運動平時少播出，未必人人睇得明，所以選主持亦好重要，負責節目的總經理曾志偉因此一早吩咐主持人要做好功課，既要用觀眾的平常心去理解各項運動，又要搞清楚規矩。開播至今，坊間反應似乎以男主持鄭衍峰較為受落，認為解釋清楚外亦有親和力。
鄭衍峰這次有機會與港姐宋宛穎、邵初合作做節目，去年他曾主持東京奧運，加上今次成為「雙奧主持」，明言希望年底有機會參與世界盃達成里程碑。鄭衍峰早前被媒體爆料指秘約視后李佳芯，後來他澄清是認錯人，因為事件主角是單眼皮，不似他是雙眼皮，相信今次做完冬奧主持，被認錯的機會將大減。
冬奧播了連日收視堅挺，証明有固定觀眾日日捧場，無綫節目部自然想乘勝追擊，只是加料估計要花費近七位數字的額外支出，聽聞主席許濤認為有成績錢不怕花，亦可以順勢催旺J2人氣，所以加料機會應該極大。
小鯊
** 博客文章文責自負,不代表本公司立場 **
