過年入迪士尼買限量版徽章 兼食「大吉大利」飽

昨天終於捱過最後一個上班日，Thank God It's Friday，雖然未團年，但係可以收工。Sebastian 想走時，收到老友Ariel電話，話過年無出埠，想去迪士尼，問我迪士尼過年有乜嘢玩？

Sebastian急急whatsapp迪士尼老友問問，又發覺樂園過年真係有氣氛喎，今年啱啱係迪迪尼十週年，過年搞埋《Happily Ever After》賀新春活動。由大年初一起，入樂園即可獲贈一封充滿迪士尼特色的賀年利是，內有米奇頭「福」字朱古力金幣，利是封特別以全新音樂劇「迪士尼魔法書房」中的米奇老鼠、高飛和雪人小白為主題，好似有少少收藏價值喎。Ariel係收藏迷，我估佢就唔會食粒米奇頭朱古力，會放入柜展覽啦。

講起收藏，Ariel次次入迪士尼都會買徽章，過年迪士尼就推限量版徽章，喺樂園嘅小鎮沖印店有售，售價288元，取其「易發發」同音，而編號都會跳過「4」字。特別版徽章限量2006套，我怕Ariel呢個徽章迷要大破財買齊五款至肯走。

迪士尼新年推限量版徽章。

當然想影相就要等一眾迪士尼朋友包括米奇、米妮、唐老鴨、高飛、黛絲、布魯托、鋼牙奇奇、大鼻帝帝、迪士尼小熊Duffy與ShellieMay，佢地全部換晒賀年服飾，在美國小鎮大街同旅客拜年，怕只怕要排好耐先至有得映。

一眾公仔換晒特色過年服裝。

至於有乜嘢食，我估Ariel反而鐘意特色飽點「大吉大利」紅豆飽（38元）和「年年有餘」吞拿魚紅豆飽（45元），可以買幾個出來做手信。另外樂園內的美食亭、餐廳都會推出賀年美食。在美國小鎮大街沿途可買到蘿蔔糕、炸魚皮、年年有魚脆米餅及楊枝金露，恐怕四圍食完嘢都唔使食套餐。

美國小鎮大街市集餅店賣「大吉大利」紅豆飽與「年年有餘」吞拿魚紅豆飽。

想睇騷可以在睇新推出的百老匯式音樂劇「迪士尼魔法書房」、遊走於全新嘅「童話園林」，或者同《星球大戰》的風暴兵一齊在「明日世界」巡邏。又可以去「反斗奇兵大本營」抱抱《反斗奇兵3》的勞蘇。到咗晚上，睡公主城堡由初一起，每晚6時30分都會打鑼打鼓，舞龍舞獅，好有節日氣氛。

Sebastian

** 博客文章文責自負,不代表本公司立場 **

海洋公園高層請食飯，席設園內的海龍王餐廳，Sebatian每次來呢度食飯都覺得好正，因為對住個超級大型嘅水族缸，有好多魚在外邊游來游去，感覺真係非常之relax，未去過嘅朋友一定要去吓。

海龍王餐廳有真正海洋景

今次食飯嘅主題菜係猴年新春套餐，四位用嘅套餐收1988元，食物相當豐富。不過臨場吸引左我嘅反而係海洋公園主席孔令成，特別推介嘅熱狗，孔主席發覺有隻美國紐約式Nathan牛肉腸好正，結果就特別叫海洋公園採購呢隻腸返嚟，做出一個熱狗餐。

Nathan牛肉腸套餐

由於只係試食，我只係食咗三分之一個熱狗，但係發覺呢種Nathan牛肉腸食落比較有咬口，雖然我唔係飲食專家，只能講「食腸有腸味」呢啲好行貨嘅評價，亦覺得幾好食，仲有三色醬料任加。

有同枱嘅朋友話，208元個熱狗餐，都唔係幾便宜。但我就認為，去海洋公園餐廳消費，又有來路腸、龍蝦沙律又有薯條啤酒，計落又唔貴喎。聽餐廳方面講，熱狗餐推出之後幾受歡迎，兩日買咗三百幾個餐。當然唔鍾意食熱狗餐就可以食正路嘅猴年新春套餐啦。

如果你喜歡飲食，海洋公園嘅印度菜搞得越嚟越正宗，海洋公園營業及事務執行總監李玲鳳話，由於印度嘅客人增長得好快，佢哋已經請咗兩個印度裔廚師，其中一個係香港土生土長。佢哋打算另外再從印度直接請一個廚師返嚟，做更正宗的印度口味菜式。

海洋公園高層齊賀年。海洋公園主席孔令成（中），營業及事務執行總監李玲鳳（右）。

過年去海洋公園仲可以睇下全球最細的馬騮，來自南美洲的侏狨和赤掌獠狨。侏狨身長只有12至15厘米，只有手掌大小。牠的頭顱可以180度轉動，非常有趣。

另外仲有花式溜冰騷睇。呢個騷聖誕都搞過，大受歡迎，為匯演編舞的Sarah Kawahara來頭唔嘢小，佢係2002年冬季奧運會開幕及閉幕式滑冰舞蹈設計師兼艾美獎得主，成個騷由世界級滑冰高手擔綱演出，施展空中高難度動作同溜冰特技，配合埋視覺效果，會令人好似置身萬花筒一樣，有七彩繽紛的感覺。