星戰傳奇殺入迪士尼

朋友Jack是忠實的星戰迷，佢話由第一套電影追到依家最新系列，成日問我知唔知香港迪士尼搞緊的星戰主題幾時可以玩，話要帶埋囝囝去，等囝囝「承傳」佢的星戰基因。

剛好今日撞到迪士尼的公關，Sebastian當然唔放過發問啦，佢哋話明日世界的「飛越太空山」全面升級，變身成為充滿星球大戰元素的Hyperspace Mountain，希望可以在今年6月推出，星戰粉絲仲可以成為「武士學堂」的學員，一同用鐳射劍，與邪惡勢力對抗。

其實依家園區已經推出好多星戰系列相關的產品。

明天(2月16日)仲會在包括香港的全球迪士尼，推出“TSUM TSUM”與《星球大戰》眾多人氣角色合作的毛公仔，一共有12隻不同角色，唔知你叫得幾多個角色名字呢？

綠色的係尤達大師，仲有一睇髮型就知的莉亞公主，白兵、朱兒、R2D2、 C3PO，我就最鍾意隻黑武士，邪中帶正，變身公仔後，仲要賣吓萌。

除了星戰系列產品，仲可以將星戰角色「食」落肚，在樂園中餐廳，有黑白相輝的椰汁糕同芝麻糕，在明日世界的西餐廳就有星戰漢堡包，睇真啲，呢款漢堡包的面包唔同普通食開的，原來係用白米做，咁咪即係「饅頭」漢堡包囉。

白色是椰汁糕，黑色是芝麻糕

星戰漢堡包

今年夏天，到星戰主題新項目落成，相信又會吸引一眾星戰迷，入去感受一下星戰傳奇啦。

Sebastian

** 博客文章文責自負,不代表本公司立場 **

昨天終於捱過最後一個上班日，Thank God It's Friday，雖然未團年，但係可以收工。Sebastian 想走時，收到老友Ariel電話，話過年無出埠，想去迪士尼，問我迪士尼過年有乜嘢玩？

Sebastian急急whatsapp迪士尼老友問問，又發覺樂園過年真係有氣氛喎，今年啱啱係迪迪尼十週年，過年搞埋《Happily Ever After》賀新春活動。由大年初一起，入樂園即可獲贈一封充滿迪士尼特色的賀年利是，內有米奇頭「福」字朱古力金幣，利是封特別以全新音樂劇「迪士尼魔法書房」中的米奇老鼠、高飛和雪人小白為主題，好似有少少收藏價值喎。Ariel係收藏迷，我估佢就唔會食粒米奇頭朱古力，會放入柜展覽啦。

講起收藏，Ariel次次入迪士尼都會買徽章，過年迪士尼就推限量版徽章，喺樂園嘅小鎮沖印店有售，售價288元，取其「易發發」同音，而編號都會跳過「4」字。特別版徽章限量2006套，我怕Ariel呢個徽章迷要大破財買齊五款至肯走。

迪士尼新年推限量版徽章。

當然想影相就要等一眾迪士尼朋友包括米奇、米妮、唐老鴨、高飛、黛絲、布魯托、鋼牙奇奇、大鼻帝帝、迪士尼小熊Duffy與ShellieMay，佢地全部換晒賀年服飾，在美國小鎮大街同旅客拜年，怕只怕要排好耐先至有得映。

一眾公仔換晒特色過年服裝。

至於有乜嘢食，我估Ariel反而鐘意特色飽點「大吉大利」紅豆飽（38元）和「年年有餘」吞拿魚紅豆飽（45元），可以買幾個出來做手信。另外樂園內的美食亭、餐廳都會推出賀年美食。在美國小鎮大街沿途可買到蘿蔔糕、炸魚皮、年年有魚脆米餅及楊枝金露，恐怕四圍食完嘢都唔使食套餐。

美國小鎮大街市集餅店賣「大吉大利」紅豆飽與「年年有餘」吞拿魚紅豆飽。

想睇騷可以在睇新推出的百老匯式音樂劇「迪士尼魔法書房」、遊走於全新嘅「童話園林」，或者同《星球大戰》的風暴兵一齊在「明日世界」巡邏。又可以去「反斗奇兵大本營」抱抱《反斗奇兵3》的勞蘇。到咗晚上，睡公主城堡由初一起，每晚6時30分都會打鑼打鼓，舞龍舞獅，好有節日氣氛。