難為了前線員工

兩間免費電視台牌照出年屆滿，為咗做到聽公眾民意，通訊局搞咗三場公聽會，第一場尋晚舉行咗。

呢啲公聽會總會吸引到正反雙方參與，有人話亞視係咁重播節目，無綫又無新意，仲有人話兒童節目，唔應該咁早播添！多多少少亦會有人話支持兩個台，話應該繼續發牌。

呢類諮詢會，台上人可以聽到幾多意見一時三刻好難分析，但就難為晒前線員工。

先講吓個主持，有無覺得佢熟口熟面？睇真，佢咪就係以前成日喺電視見到，有線前主播王沛然囉！佢而家喺通訊局工作，係牌照管理組高級廣播事務主任。

坐主播台咁耐，做過咁多直播，主持公聽會應該難佢唔到。但呢啲場面往往「順得哥情失嫂意」，結果去到後尾有人覺得唔公平嘈起黎，最難為邊個？王沛然只係指指點點，通訊局高層、電視台代表坐晒喺台上，結果咪又係令企喺台下面的通訊局職員「食死貓」囉！

場內唔少工作人員，除咗維持秩序，仲要負責「遞咪」。邊個手上有咪，就有權講嘢，人人都想搶到手啦！唔輪到我，我咪搶囉！又或者大聲過你，務求要「發聲」！結果有啲攞唔到咪的市民，就遷怒於呢班工作人員，散場時慘成為攻擊「目標」，慘變人家的「出氣袋」。

睇返尋日坐喺台上面，一字排開十幾人，除左通訊局成員、兩台代表，仲有總監、副總監、秘書等人，台下又有一班官員坐喺度。

面對呢啲大場面，通訊局係咪應該安排資深職員，愈係高官厚祿的係咪可以考慮吓身先士卒，親身負責「招呼」呢啲熱情的市民，咁樣前線的員工個心都可能舒服啲。

以前成日話打政府工好，但面對而家咁政治化的環境，咩都有人嘈，又成日俾人指住嚟鬧，政府工都冇以前咁筍喇。

Ariel

** 博客文章文責自負,不代表本公司立場 **

馬年果然多異動，尤其行得快啲的電子傳媒，呢頭有人走，果頭又有資深傳媒人返新工，喺無記同亞記做過新聞部高層的唐德全回巢TVB，即時引起同行喁喁私語，會唔會無記新聞部有異動呢，老細係咪覺得花哥(無綫新聞阿頭袁志偉)壓唔住場呀？

有爆料人就叫大家唔好諗多咗，人稱阿唐的唐德全唔係返新聞部，佢以前做過花仔的上司，又點會再同花仔爭位？

阿唐今次係去製作部做吓顧問，主力係幫《東張西望》。話說《東張西望》除咗報導娛樂消息之外，亦有部份內容講社會時事。依家班節目製作人員唔係新聞科班出身，做時事專題方面有時吃力不討好，好似上年講免費電視發牌風波咁，收到唔少投訴，俾通訊局砌。

依家正開始緊免費電視牌續牌的公聽會，無記本身已經夠多仇家，《東張西望》即使唔係新聞部製作，若講到時事嘢時，電視台好鬼多規章限定，觸及到一些敏感的題材，好容易會踩界。

  

可能係咁，無記覺得需要搵個資深傳媒人壓陣，提供專業意見。阿唐縱橫新聞界廿幾三十年，又先後做過亞視同無線新聞部副老總，經驗豐富。之前重返亞記，但因為ATV焦點事件，同老細征哥唔多妥，去年離開亞視，無記向佢招手，自然一拍即合啦。

計吓無記已經搵咗唔少資深傳媒人，可以話盡攬天下人才。之前免費電視發牌事件，無記覺得被針對，又成日俾人鬧壟斷，嚟緊續牌公聽會，實俾人用放大鏡去睇佢哋啲節目，如今搵多啲人幫手睇住，呢啲錢值得花啦。

  

不過，外界咁like魔童搞電視，無記俾人話一台獨大，亞記又弱不禁風，睇嚟續牌呢場仗，唔單止無記和亞記難打，最後要揸弗決定續唔續牌俾佢地的政府，都唔易搞啦。