霸戲哥之日常#034 │ 正義之Bob

疫情嚴峻，撇除前線班醫護，計落最辛苦都應該係速遞員。送水捧餐托米零貼士事小，隻身穿梭疫廈都未算慘，眼見同事輪住中招，一人做幾個人嘢，莫講食飯，連肚痛都唔敢屙。

偏偏有啲茂梨，唔感激速遞員不得止，仲係都要搞到人哋冇咗份工先安樂。

事緣有位速遞哥哥為咗爭取少少食飯時間，靜靜匿埋一邊，坐喺回收筒旁起勢咁扒。點知好事茂梨以衞生為由，偷影完人再放上網公審。

詳情自行去小西灣富景花園居民聯絡組了解。睇見各路英雄留言之踴躍，相信茂梨已經得到應有報應。

又咁諗，冇咁醜陋嘅人，又點襯托出阿Bob林盛斌嘅高尚？阿Bob亦係第一位為呢件事抱不平嘅藝人，又話若果速遞哥哥畀人投訴到冇咗份工，會私人醒份過佢。

So generous。

阿Bob平時扮鬼扮馬，唔介意醜化自己做下把畀人笑，但去到呢啲位，最古道熱腸嗰個亦係佢。

香港，勝在有正義之Bob。

霸戲哥

** 博客文章文責自負,不代表本公司立場 **

豬視妹先小人後君子，講明呢幾日除咗《華燈初上》第三季，其餘節目一律唔准睇，直至煲完為止。

佢咁惡死都有原因嘅，第三季原本話2月喺Netflix推出，但播映日期一拖再拖，拖到聽日終須見家翁。呢類燒腦劇，梗係想知邊個係兇手啦。正如犯罪小說睇到一半，好難唔追埋個尾。

至弊係豬視妹成日偵探上身，同霸戲哥分析蘇媽媽（楊謹華）嘅死，係同愛子（郭雪芙）、阿季（謝瓊煖）有關。唔，佢又改口話係Ross媽媽（林心如）嘞。

「我知係邊個啦！肯定係佢！」又嚟。

有報道話喺台北某超市野生捕獲鄭伊健，傳佢會加入劇組，《華燈》製作公司亦證實咗。

「係陳浩南過台灣同馬天華（霍建華）講數，然後殺埋佢契家姐。」

你唔好話佢搵埋山雞擺和頭酒⋯⋯當然我冇反駁豬視妹。如果唔係下一個兇手，我敢肯定，一定係佢。