博客文章
TVB套《家族榮耀》今個禮拜大結局喇，終於唔使聽到霸戲哥話我霸住個搖控。豬視妹最關心當然係之後播乜，唔通係佢感受咩。
之前傳過何廣沛主演嘅《食腦喪B》係緊接《家族榮耀》檔，點知突然變卦，改播大陸劇《機智女法醫》（原名《御賜小仵作》）。我估係套劇喺大陸爆紅吧。
不過，《機智女法醫》最初喺大陸播出嗰陣，係畀網民笑為「三無劇」，無卡士、無製作費同無宣傳，即係炮灰啦。點知出街反應離奇咁好，豆瓣評分高達8.3，又一刀仔鋸大樹嘅典範。依家個女主角蘇曉彤仲人氣爆燈，拍得住佢個賣五糧液嘅老竇。
套劇改編自《御賜小仵作》同名小說，講述來自仵作（現代法醫）世家嘅楚楚（蘇曉彤）為實現仵作夢想，跑到長安城參與仵作考試，憑學識同能力，受到安郡王蕭瑾瑜（王子奇）賞識，一齊聯手破案。
聽落咪即係古代版《法證先鋒》？唔知同《洗冤錄》又似唔似呢？
霸戲哥
** 博客文章文責自負,不代表本公司立場 **
Marvel新作《Ms. Marvel》今年6月喺Disney+上架，預告片亦啱啱出爐。
新作重點，係終於有穆斯林做超級英雄（仲要係女性），女主角Kamala（Iman Vellani）係繼黑豹同尚氣之後，另一個非白人主角。喺近年左膠當道嘅荷里活世界，呢個係符合國情但亦係重要里程。
回顧荷里活影史，穆斯林一係畀人當透明，一係被stereotyped成大反派。呢個風氣喺911之後更甚，唔係扮恐怖分子就係殺人犯，等做白人主角嘅出氣袋（戲內戲外）。就算安排到個忠角，佢哋嘅造型亦來來去去幾款，唔係鬍鬚勒特就重口音。咁都唔算種族歧視就冇乜嘢好講。
所有今次《Ms. Marvel》由穆斯林女仔拯救世界，係打破好多白人嘅心理關口。
套戲講Kamala身於美國，自細存在感都好低，本身係Captain Marvel嘅鐵粉，同其他超級英雄一樣，有日意外得到超能力，從此扭轉命運。說穿了，其實就係每一個穆斯林家庭力爭上游嘅故仔。
就trailer睇，《Ms. Marvel》都似校園青春片格局，如果唔係穆斯林主角，其實同《蜘蛛俠》冇乜分別。又即管睇下會唔會吸引到年輕觀眾啦。
