霸戲哥之日常#039 │ 珊迪娜布洛

57歲嘅金像影后Sandra Bullock宣布暫時息影，未來幾年會花多啲時間照顧一對養子女，盡番阿媽責任。

從來都唔係Sandra Bullock粉絲。撇除佢個名好似讀極都讀唔到，就覺得佢個樣硬係怪怪哋，個口仲大過某位倒米KOL。需知同期荷里活女星隨口數埋一堆，Meg Ryan、Demi Moore、Winona Ryder全部女神級，Sandra點會係霸戲哥杯茶。

到中學某年，個個同學都講緊《生死時速》（扮緊奇洛李維斯先真），先開始留意Sandra，之後嘅《選美俏臥底》同續集係有睇，但對於呢類傻大姐角色冇乜特別鍾愛，就算佢憑《The Blind Side》拎Oscar影后，我都唔覺得佢演得特別好，只係嗰屆對手比較弱，又或者「夠鐘」頒啦。反而同年Sandra憑《All About Steve》拎最爛演技金草霉獎，佢親自上台領獎，佢展現嘅氣度先令我刮目相看。

近年Sandra已大幅減產，原來對上一部睇佢嘅戲已經係Netfilx嘅《蒙上你的眼》，哈，我都係覺得好一般。遲啲有機會先睇埋佢套《無赦》。

Anyway，祝Sandra短暫退休生活愉快。

霸戲哥

** 博客文章文責自負,不代表本公司立場 **

某日路過文具店，見當眼處擺滿卡通精品，相信係時下細路嘅潮流指標。估唔到仲有多啦A夢精品賣，而冇我最想要嘅美少女戰士筆袋。

「乜依家仲有叮噹做咩？」我問。

「咩冇呀。之前無綫仲有播。」豬視妹答。

猛然醒起，年前先至送咗個多啦A夢3D Puzzle畀豬視妹個侄仔。係多啦A夢拉近兩代人嘅鴻溝。

那些年仲係叫《叮噹》，記憶中係喺《430穿梭機》時段播出。可能男仔關係啦，好自然會代入大雄視角，對於佢成日畀技安同阿福蝦，可以話感同身受。直至依家我都有個疑問，究竟女仔會代入邊個角色，叮噹？靜宜？定係技蘭？ 

到後來《叮噹》出合訂本，霸戲哥幾乎期期都買。我諗我有好多價值觀，都係喺漫畫度學，譬如「得些好意需回手」同「惡有惡報」等等。或者實在太多回憶，每次睇多啦A夢大電影都喊死，最慘係差唔多年年都要喊一次。

2020年上映嘅《多啦A夢：大雄之新恐龍》，今個星期日晚9點半會喺J2台播出，呢套同1980年套《大雄的恐龍》係完全冇關係嘅，雖則大雄依然係着黃色短袖衫嘅大雄，多啦A夢依然係危急關頭救全家嘅多啦A夢。而我，依舊係大喊包。

從來冇長大嘅唔止大雄，仲有我。