博客文章
霸戲哥讀U嗰陣（二十幾年前）成日走堂，唔喺球場嘅話，就係流連VCD舖（正版）。記憶中，當時賣緊100蚊3隻，間中做特價100蚊4隻，但多數係啲舊片，又或者唔太受歡迎嘅戲。因為住Hall嘅關係，啲VCD買完返嚟周圍「pat」，傳吓傳吓，偶然會執到「荀嘢」，包括三仔……
我對美亞嘅認識，亦係由當時開始，一齣戲兩隻VCD，中間個隔成日爛，封面玻璃又花晒。不過美亞VCD係陪伴咗我好多個孤獨夜晚，而我咁鍾意電影，或多或少都同美亞有啲關係。
無啦啦講美亞，其實因為美亞娛樂最近聯同TVB推出YouTube頻道「8號電影院」，可以免費任睇超過500套港產片同79套TVB獨家製作嘅電視電影，好似豬視妹最愛嘅《行運一條龍》、《辣手神探》都有得睇，而4月1號晚有《算死草》添。
睇嚟我櫃筒底啲VCD可以拎去recycle啦。
霸戲哥
** 博客文章文責自負,不代表本公司立場 **
《CODA》喺今屆奧斯卡大獲全勝，三提名三中，包括最佳電影、最佳男配角同最佳改編劇本，如果唔係Will Smith搶晒fo，洗板嘅應該係《CODA》。
好多人都知呢套戲係改編自法國勵志片《閃亮的歌聲》（La Famille Belier），故事大同小異，都係講健聽女孩生於聽障家庭，要準備離開家園追夢。女主角Louane Emera喺「法國好聲音」成名後出碟，首次拍戲就贏得法國凱撒獎最佳新人獎。
《閃亮的歌聲》15年喺香港上映過，負責發行嘅就係@goldenscenehk Golden Scene，Winnie Tsang真係別具慧眼。可惜呢類戲始終係小眾，當年票房遠遠比唔上同期嘅《移動迷宮：焦土試煉》（笑）。香港人嘅品味係咁上下。
當年冇睇過《閃亮的歌聲》嘅，依家大把機會，唔係叫你上網搵link，係去itunes、googleplay、NowE同hmvod度望下啫。聽聞Winnie Tsang諗住喺@goldenscenecinema 高先電影院搞番場正場，到時大家要把握機會啦。
不過都係等戲院開番先啦。
