博客文章
每年四月一日，大家只會想起哥哥。所以呢篇文點都要寫。
以前寫過好多篇哥哥專題，但原來未試過為佢嘅電影排名，可能廢事畀人鬧啦。呢度我主場，就決定同佢排一排，睇吓係咪你哋心水。
第一位：阿飛正傳
我唔明點解有人會睇到割櫈。哥哥嗰種不覊植入骨䯝，係點都模仿唔到。或者我只係一隻有腳嘅雀仔。
第二位：倩女幽魂
記得細個入戲院睇，以為係鬼片，點知見到王祖賢出浴，個心卜卜咁跳。套戲灌輸我好多做人價值觀，譬如，連鬼都要幫。
第三位：英雄本色
明明個差人角色咁乞人憎，你都會同情佢。換轉其他演員做，你未必感受到嗰份兄弟情。
第四位：鎗王
係，我鍾意哥哥演反派，唔似啲大明星有偶像包袱。佢喺《鎗王》嘅演出係極有層次，將狂妄、嗜血、悲憤同内疚嘅情緒融合，演技神級。但係，香港電影金像獎連提名都冇。
第五位：家有囍事
雖然係合家歡群戲，但哥哥嘅光芒冇被掩蓋。最鍾意佢打牌嗰幕。
第六位：胭脂扣
第七位：烈火青春
第八位：春光乍洩
第九位：東邪西毒
第十位：霸王別姬
霸戲哥
** 博客文章文責自負,不代表本公司立場 **
霸戲哥身邊有好多朋友，見我無所事事，一直游說我玩crypto。佢哋灌輸好多抽象嘅概念，甚麼去中心化呀，甚麼對抗現有金融體制呀，總之好有vision。最重要係，佢哋又真係坐定定賺到錢，講到霸戲哥心郁郁。喂，有邊個唔想不勞而穫？
對於crypto概念，霸戲哥係百分之一百相信，亦都覺得係大勢所趨。但去到呢刻，我都解釋唔到點解仲未進場。我硬係覺得有嘢唔妥，但又講唔出係乜。
直至最近睇咗Netflix套紀錄片《別相信任何人：虛擬貨幣懸案》，我諗呢個疑團終於解開。
紀錄片講述轟動一時嘅疑似cryptocurrency欺詐案件，話說有2.5億美元嘅bitcoin喺加拿大最大嘅加密貨幣交易所QuadrigaCX度消失，而QuadrigaCX創辦人Gerald Cotten係唯一可以取回bitcoin嘅鎖匙人，但突然離奇死亡，令一班苦主血本無歸。紀錄片用唔同角度，嘗試搵出真相。究竟Gerald Cotten係「假死」夾帶私逃？定係佢身邊人有警轟？還是其實一切都係陰謀論？呢個就要觀眾自行去判斷。
唯一可以肯定嘅，貪字永遠得個貧，若果閣下存心諗住靠炒crypto一夜致富，霸戲哥都係勸你咪制。
