博客文章
讀U嘅時候，人人都聽Twins，唯獨霸戲哥鍾情S.H.E，全因為一首歌，早午晚都要loop佢一次。
友達以上，戀人未滿，甜蜜心煩，愉悅混亂。簡單幾句歌詞，講中晒單戀嘅滋味。所以，當豬視妹無啦啦問我有冇試過單戀，我真心唔知點答佢。乜有人未試過單戀嘅咩？
原來豬視妹最近煲緊Disney+嘅韓劇《單戀原聲帶》，就係講一個友達以上、戀人未滿嘅曖昧故事。身為攝影師嘅朴炯植，一直暗戀相識19年嘅青梅竹馬好友韓韶禧，但因為唔想失去呢份友誼，一直唔敢同女方表白。後來一次機會，朴炯植搬到韓韶禧屋企「同居」，朝夕相對下終於擦出愛火。又係老土愛情橋，擺明睇靚仔靚女架啦。
人大咗懂事，會刪除好多不設實際嘅幻想，單戀唔會再有了。不過我偶爾都會拎番S.H.E隻CD出嚟聽，回味一下年少嘅戇居。
霸戲哥
** 博客文章文責自負,不代表本公司立場 **
今朝起身傳來噩耗，一代傳奇武打巨星「獨臂刀王」王羽今早於台北振興醫院逝世，享年80歲。其女兒王馨平喺社交平台證實消息。
王羽從影40多年，畢生拍攝超過80部電影。一出道已經憑邵氏電影《獨臂刀》（1967）走紅，之後幾年幾乎戲接戲冇停過。90年代開始淡出從商，所以年輕一輩或者未睇過佢嘅戲。
《獨臂刀》除咗捧紅王羽，亦令大導演張徹聲名鵲起，佢融合日本劍戟片風格，再加入個人元素，形成新派「暴力美學」，開創武俠片嘅風潮，係香港電影史好重要一環。而當年嘉禾有意拉攏王羽拍《獨臂刀大戰盲俠》，畀邵氏控告侵權要打官司，亦成為一時佳話。
2011年，王羽獲陳可辛邀請出山拍攝《武俠》，結果重拾戲癮，2013年更憑《失魂》奪得台北電影節最佳男主角。大家有機會可以睇吓。
戲入面飾演大俠，現實中王羽亦係一名鐵漢。2015年喺泰國機場中風暈倒，要緊急送院進行兩次開腦手術。走過鬼門關，王羽積極接受各種治療，包括高壓氧、針灸同推拿，絕對係令人敬佩嘅生命鬥士。
願獨臂刀王安息。
