霸戲哥之日常#096 │ 月亮撞地球

呢個月特別多「月」字戲，除咗Disney+上架嘅《月光騎士》同《月老》，呢緊4月21日上映（如果戲院重開）仲有套《月球隕落》，真係月鬧。

災難片《月球隕落》係「末日之父」Roland Emmerich執導，大家應該絕對唔會陌生，拍過《天煞地球反擊戰》、《明日之後》、《2012末日預言》，地球畀佢拍到越來越危險。今次講到月球撞埋地球添，而扮演救世主嘅就係Patrick Wilson同Halle Berry。唔好畀霸戲哥睇死，劇情九成九係NASA或者美國政府隱瞞事件，點知紙包唔住火，繼而爆發大災難，帶出人禍比天災更可怕。

睇外國評論，套戲評價麻麻，大家想學尖酸刻薄嘅英文，可以上去rotten tomatoes望下。咁多負評，霸戲哥反而更加想睇有幾爛，仲要喺大銀幕睇先夠震撼呀。

霸戲哥

** 博客文章文責自負,不代表本公司立場 **

民以食為天，霸戲哥日日身水身汗開工，無非都係搵餐晏仔食，等豬視妹同大爺雞唔使餓死。所以每日最開心嘅時間，就係開枱埋位等食，見到大爺雞起勢咁搖尾，幾辛苦都值得。

食物亦係連接人際關係嘅重要橋樑，尤其一場世紀疫情，令人經歷許多生離死別同分隔，能夠齊齊整整坐埋一齊食餐飯，絕對係難能可貴。

Chef LeMon繼《鋒味》之後，最近又聯同江蘇衛視拍攝美食真人騷節目《百姓的味道》，聽日起逢星期四晚上8點半喺@j2_original J2台播出。霆鋒今次化身美食尋味官，每集同嘉賓走遍大江南北，上山下海找尋珍貴食材，除咗美食之外，接觸到嘅人同事，都一樣有特別味道。

其實霸戲哥都有陣味，聞唔到但睇得到。係窮呀。