霸戲哥之日常#099 │ 藤子不二雄Ⓐ

日本著名漫畫家藤子不二雄Ⓐ，今早在日本川崎市的家中離世，享年88歲。佢嘅作品《忍者小靈精》、《Q太郎》等卡通，對70後、80後嘅成長有好大影響。

霸戲哥印象最深係《Q太郎》（因為亞視播），其中有隻女鬼叫腰子（定Ｕ子），情格火爆又醜樣，次次見親Q太郎都撻佢一嘢。「腰子」就成為咗我對醜樣女同學嘅統稱。當時成日諗，點解正太同Ｑ太郎淨係識食玩同瞓，做事提唔起勁又成日撞板，但都做到主角？後來終於諗通，藤子不二雄Ⓐ應該想我哋呢啲平凡人有共鳴感，就算天資比人差，透過後天努力都可以成才。或者呢個都係藤子不二雄Ⓐ嘅寫照。

藤子不二雄Ⓐ小學就立志做漫畫家，1951年讀高中時出道，喺《每日小學生新聞》刊登作品。到1954年正式成為專業漫畫家，同藤本弘（即藤子·F·不二雄）一齊到東京發展，打響名堂。

2008年藤子不二雄Ⓐ獲頒旭日獎章，2014獲頒手塚治虫文化特格獎。期後於2015年正式封筆。

多謝藤子不二雄Ⓐ帶畀我哋好多美麗嘅童年回憶。願安息。

霸戲哥

** 博客文章文責自負,不代表本公司立場 **

2022年香港電影業嘅第一個喜訊，係英皇電影《海關戰線》開鏡拜神！第五波疫情搞咗幾個月，都唔記得幾耐冇聽過「開鏡」兩個字。希望電影業快啲陸陸續續回復正軌，人人有工開有飯開啦。

《海關戰線》由張學友、謝霆鋒、林嘉欣、劉雅瑟、吳鎮宇主演，導演、編劇就係邱禮濤、李敏呢對好拍檔。原來今次係學友同霆鋒第一次合作，霆鋒仲做埋動作指導添。

霸戲哥雖然有好多hallmate做海關，但海關其實平日要做啲咩，一時間真係諗唔到。檢查行李？緝毒？打擊走私？搜老翻袋又係咪佢哋工作範圍呢？

紀律部隊嚟講，講海關嘅戲又真係比較少。照邱禮濤、李敏拍慣大場面嘅經驗嚟講，《海關戰線》格局斷估唔係打擊走私龍蝦呢啲細囈嘢，起碼都要搗破跨國犯罪集團，加幾幕荷槍實彈嘅槍戰先夠氣勢。