博客文章
今時今日，如果唔識動畫《咒術迴戰》或《鬼滅之刃》，根本好難同後生仔溝通。為咗令自己感覺young啲，霸戲哥好努力煲咗幾集《咒術迴戰》。我發覺，依家啲動畫除咗講求畫質、故事、分鏡同剪接，就連節奏都非常講究，絕對唔容許《足球小將》咁，成集都未起腳射波嘅泵波鐘情況出現。
《咒術迴戰》嘅世界觀幾特別。話說人類嘅負面情緒累積後會形成咒靈，並會對人類造成傷害。只有「咒術師」可以利用咒力對抗呢啲咒靈。聽落係咪有啲似天師呢，只係咒術師打得型好多，又唔怪得後生仔女咁鍾意。
另外，動畫電影《劇場版 咒術迴戰 0》早排喺亞洲上映都勁收得，喺台灣一登場就打破今年開畫票房紀錄，票房佔率高達78%，都咪話唔犀利。至於香港呢，暫時安排5月19號上，但都要視乎疫情啦。
等唔切嘅你，逢星期四晚11點半可以去J2睇住動畫先，可以聽粵語配音。想原汁原味同一氣呵成嘅，依家Netflix都有得睇。
霸戲哥
** 博客文章文責自負,不代表本公司立場 **
@christineng 伍詠薇噚日喺facebook溫提大家，話「雙魚座真係好繁複，今集一定有意外驚喜」。佢呢句話，原來都暗藏玄機。
人人都有盲點，偏向相信直覺，再自圓其說斷定真相。但真相係點，從來只有當事人先知。就好似霸戲哥咁，起初認定伍詠薇當@chloe_so 蘇皓兒係搖錢樹，所以一直用情緒勒索嚟控制對方。實情係，佢箝制女兒嘅一舉一動，甚至施虐，只不過係源自扭曲嘅愛，並唔係存心傷害對方。去到後尾，伍詠薇都承認係怕畀蘇皓兒拋棄，先用情緒勒索將兩人命運綑綁。
咁點解伍詠薇話雙魚座好繁複？答案就係，原來我哋一直畀編劇（同伍詠薇）誤導，忽視咗戲入面同樣係雙魚座嘅蘇皓兒。亦即係話，佢可能同樣擁有雙面人性格。
直至蘇皓兒見到「施比受更加有福」嘅單張，直覺以為伍詠薇咁多年嚟一直剝削緊佢，先有最尾嘅大扭橋出現，以其人之道還治其人之身，剝削返下身癱瘓嘅伍詠薇。而呢個舉動並唔係出於孝心，而係報復，報番當年被潑漒水之仇。
霸戲哥好鍾意呢集嘅佈局，好有《Black Mirror》feel，尤其喜歡嗰種你認為理所當然嘅事，但並唔係想像中咁簡單。伍詠薇繼續發揮世一演技，最尾喺輪椅上面嘅表情，係包含咗愧疚、悔撼、憐憫、羞恥、無奈同噁忍，佢覺得自己做錯事，下半世畀個女折磨都無話可說。
咦，今年視后係咪提早跑出咗呢？
