霸戲哥之日常#111 │ 費爵爺

豬視妹捧曼聯。我唔敢話佢係勝利球迷，至少曼聯依家踢成咁，佢都仲盲撐。當然，佢睇波年代係曼聯王朝，碧咸、舒米高、傑斯、史高斯同黑雙煞個個獨當一面，背後全賴總舵手：The Boss費格遜。

我對費爵爺嘅認識唔算深，只知佢係一個above average嘅足球員、一個惡死能登嘅領隊、令對手聞風喪膽嘅「費格遜時間」(Fergie Time)、同埋佢嘅傳統陣式4-4-2-4（連球證旁證）。

呢日陪豬視妹睇咗齣紀錄片《費格遜永不言敗》，令我加深對費格遜嘅認識，同明白佢點解咁受人尊重。

紀錄片係由費格遜個仔Jason親自執導，由費格遜嘅成長背景同球員生涯講起，講佢點樣少不更事、酗酒同打交畀人拉，仲差啲放棄埋足球。佢嘅教鞭生涯都唔係一帆風順，教曼聯頭幾年畀球迷噓爆，仲叫佢滾返去蘇格蘭⋯⋯

有啲人遇到失敗會一蹶不振，但費格遜每一次嘅失敗，都成為鞭策自己嘅原料，令佢邁向成功。

霸戲哥以前成日覺得費格遜好運啫，有班咁好嘅球員，依家諗番轉頭，反而覺得班球員死好命，遇到一個可以改變自己一生嘅Boss。

人生有個好boss，夫復可求？

霸戲哥

** 博客文章文責自負,不代表本公司立場 **

呢陣子，都有唔少關於TVB嘅消息傳出。最新鮮滾熱辣嘅，一定係話首席創意官王祖藍唔妥高層劈炮唔撈。傳聞炒咗唔夠一個禮拜，TVB就發聲明粉碎謠言。

其實高層嘅去留，好雞毛蒜皮啫，居然都引起咁多人關注，好明顯，久違嘅電視大戰已經爆發，配合網絡水軍煽風點火，少少嘅輿論、版面，都成為兵家必爭之地。

霸戲哥呢啲升斗市民，梗係有花生食完就算。不過既然有花生食，都想有好戲睇嘅。依家電視風雲再起，對市民嚟講，絕對係最想見到嘅事，因為各台都會各施各法，激發更多有創意同高質嘅節目。只有咁樣，先可以放眼更大嘅市場，同日本、韓國、東南亞爭一日之長短。

話時話，呢個謠言其實會唔會係王祖藍嘅計中計？係就真係夠創意啦。