開番盞燈先，啱啱睇完今晚呢集，到依家都仲怯怯哋。
單元《姐姐》一開場已十級驚嚇，姐姐瞓喺浴缸自插滿缸紅，就算下一幕有李施嬅同陳山聰鴛鴦戲水都中和唔番。故事講黃子雄同樊亦敏兩公婆請咗個後生嘅工人姐姐，其間發現呢位姐姐神神秘秘，夜媽媽會偷入女兒間房，收埋女兒隻公仔，仲養咗隻疑似鬼仔添。
播咗三個單元，霸戲哥開始明白點解每個單元都分兩集。頭一集主要係用嚟誤導觀眾，第二集先嚟個大扭橋，推翻觀眾嘅一切想法。基於呢個前設，好自然會推斷到呢集會先黑化姐姐，暗示佢識南洋邪術，又講到佢會圖謀不軌咁。
我哋之所以有呢啲偏見，某程度上係出於人與生俱來嘅種族歧視，呢樣當然比較複雜，亦同兩者嘅文化差異有關。少來偽善呢套啦，有幾多港人真係做到平等對待姐姐？就算同枱食飯，又做唔做到共享美食先？
去到今集尾段，我哋終於知道有古怪嘅並唔係姐姐，而係黃子雄同樊亦敏兩公婆，同埋佢哋位從未見過面嘅囡囡。心水清嘅觀眾，大概都會聯想到借屍還魂呀、奪舍呀嗰啲，好驚驚啫。
重點要提扮演姐姐嘅女演員@franchesca_wong 黃婉華，完全做到嗰種令人心寒嘅表情，成功誤導觀眾以為佢真係識落降頭。Franchesca 喺香港演藝學院畢業，之前參與多個舞台劇，拍電視劇就第一次，相信佢IG好快會有好多followers啦，因為真人絕對係靚女一名。
留名等睇聽晚奪舍。
霸戲哥
** 博客文章文責自負,不代表本公司立場 **