霸戲哥之日常#117 │ 報復式揚威

黃子華、鄧麗欣、王菀之、張繼聰、林明禎同陳湛文主演嘅電影《飯戲攻心》，因為第五波疫情關係，由原本新年食團年飯，變咗改喺中秋食團圓飯。不過最重要都係有飯開，咁先有戲力同動力繼續博殺。

正如導演陳詠燊話齋，每部戲都有自己嘅命，食唔到賀歲檔，但造就套戲入圍意大利烏甸尼遠東電影節嘅競賽單元，同時獲提名競逐The Mulberry Award最佳劇本獎，都算係有番啲安慰。

同樣有份競逐The Mulberry Award最佳劇本獎嘅，仲有另一齣港片，都係由鄧麗欣主演嘅《12日》。套戲係《12夜》嘅延續（原來已經22年前），亦係由林愛華執導同編劇。

至於喺地球嘅另一邊，又有另一齣港片揚威。彭秀慧執導，毛姐毛舜筠、姜濤同阿Jer柳應廷主演嘅《阿媽有咗第二個》，啱啱喺芝加哥亞洲躍動電影節贏咗個「觀眾票選獎」（Audience Choice Award），真係可喜可賀呀。

第五波疫情見岸，唔止有市民嘅報復式出遊，仲有港片嘅報復式揚威呢。

霸戲哥

** 博客文章文責自負,不代表本公司立場 **

朋友傳來一則重要訊息，話《逃獄兄弟2》已經定咗喺4月28號上映。戲院佬從來消息最靈通，即係話政府第一階段嘅放寛社交距離措施，相信戲院係有份嘅，今次真係還得神落囉。

咁多齣排緊隊上映嘅戲，《逃獄》相對比較應景，皆因戲名完全反映到港人心態。被第五波疫情困足近半年嘅港人，終於可以逃離社交距離地獄，出去「放風」輕鬆下。

續集繼續有「滾筒」（譚耀文）、「建天」（@mr.adampak 栢天男）、「浩正」（@louischeung2013 張繼聰）同「刀疤」（@justin311 張建聲）喺監倉服刑，本來相安無事，直至年輕企業家「賀俊」（吳卓羲）犯事入冊，監倉又重新建立新秩序。

可預計嘅劇情係賀俊利用各人嘅弱點，互相牽制，從中挑撥離間呢班兄弟嘅感情。不過霸戲哥都係最想睇佢哋點樣對付獄警黃德斌。