霸戲哥之日常#122 │ 流浪狗

幸福唔係必然，呢個世界有好多狗狗冇大爺雞咁好彩，一投胎出世就做主人，餐餐準時有雞有魚有飯飯。

單係喺香港，流浪狗嘅總數就以萬計，當狗狗唔小心踩入社區，好容易畀人舉報，然後由漁護署埋單（四日內冇主人認領，署方可將其人道毁滅）。咁多年嚟，流浪狗問題一直被人忽視。好彩，呢個世界都有好多有愛心嘅人同組織，發起拯救流浪狗行動，@paws_grs 「毛守救援」就係其中之一。

為咗令更多人關注組織嘅活動，佢哋最近拍咗條《天天》嘅短片，愛狗之人鍾舒漫仲義演一角，短片今日會放上YouTube。《天天》根據真實故事改編，講述流浪狗「天天」不時喺天台出現，成日整到啲天線，搞到鍾舒漫冇電視睇。有日鍾舒漫忍無可忍，強行捕捉天天，最後釀成慘劇。

霸戲哥知道好多呢啲愛狗組織，係好辛苦經營同極之吃力不討好，最慣常聽到就係畀人話佢哋呃善款。而事實上，佢哋每拯救一隻流狼狗，就要花好多經費喺佢哋身上。

呢篇文係大爺雞叫我打嘅，佢都好希望多啲人關注流浪狗嘅組織。All lives matter呀。

霸戲哥

** 博客文章文責自負,不代表本公司立場 **

反了反了。啲字體反晒了。來到單元《對倒》，揭開更多金宵大廈嘅秘密，大廈入面原來有兩個世界，一個係現實世界，另一個係鏡世界。通往兩個世界嘅連接點，我估應該係喺七樓半嘅一面隱藏嘅鏡。

喺《對倒》嘅鏡世界入面，會出現現實世界嘅另一個我，性格亦啱啱對倒。現實世界正義不阿嘅@ccandice.c 趙希洛，鏡世界嘅佢變成喪盡天良嘅地產高層；《雙魚》出現嘅@christineng 伍詠薇、@chloe_so 蘇皓兒兩母女，鏡世界唔再賣慘呃善款，係真心幫助街坊嘅大好人。蘇皓兒靚樣再現添。

霸戲哥最鍾意鏡世界入面嘅黑白設定，喺呢度嘅制度，傾向是非黑白顛倒不分，正義嘅人被拉去坐監，做壞事嘅人可以「合法地犯法」，仲有投「壞事保險」做風險管理，爽歪歪呢。

最陰公豬嘅可能係@derekwong726 黃建東，原本都算係循規蹈矩，但因為制度嘅淪落，令佢迫出個陰險奸相。喺鏡世界之下，我諗佢只能夠選擇盲從附和，而不能夠走出個制度。